Инсонпарварлик тамойилларини қўллаш орқали жамиятда адолатни қарор топтириш, халқимизнинг кечиримлилик ва бағрикенглик каби умуминсоний қадриятларини амалда рўёбга чиқариш, маҳкумларнинг тузалиш йўлига ўтишини рағбатлантиришга қаратилган таклифлар тайёрлаш мақсадида Бош прокурорнинг фармойиши қабул қилинган. Бу ҳақда Бош прокуратура матбуот хизмати «Xabar.uz»га хабар берди.

Ушбу фармойишга асосан Бош прокурорнинг биринчи ўринбосари раҳбарлигида ишчи комиссия ҳамда жазони ижро этиш муассасаларида жазо ўтаётган маҳкумлар билан якка тартибда суҳбатлар ўтказиб, уларнинг шахси, қилмишларидан чин кўнгилдан пушаймонлиги, тузалиш йўлига қатъий ўтганлиги, яшаш манзилларидаги маҳалла фуқаролар йиғинлари томонидан ижобий ёки салбий тавсифланиши ҳолатларини ўрганиш бўйича Бош прокуратура, Олий суд, ДХХ ва ИИВ ходимларидан иборат ишчи гуруҳлари тузилди.

Ишчи гуруҳлар томонидан фармойиш талабидан келиб чиқиб 19 мингдан ортиқ жазо ўтаётган маҳкумлар билан якка тартибда суҳбатлар ўтказилди.

Ишчи комиссия ушбу ҳужжатларни таҳлил қилиб, Президент ҳузуридаги Афв этиш масалалари бўйича комиссияга тақдим этди.

2018 йилнинг 12 июнь куни Ўзбекистон Республикаси Президенти Шавкат Мирзиёев «Озодликдан маҳрум этиш жазосини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида»ги фармонни имзолади.

Фармонга мувофиқ илк маротаба муборак рамазон ҳайити муносабати билан ҳамда Ўзбекистон Республикаси Конституциясининг 93-моддаси 23-бандига асосан билиб-билмай жиноят содир этган, ҳозирги вақтда қилмишига чин кўнгилдан пушаймон бўлган ва тузалиш йўлига қатъий ўтган озодликдан маҳрум этиш жазосини ўтаётган 226 маҳкум афв этилди.

Мавзуга доир: «Афв этиш ҳақидаги фармон ижроси ўз вақтида таъминландими?»

Афв этилган шахсларнинг 102 нафари жазодан тўлиқ озод қилинади, 71 нафари жазони ўташдан муддатидан илгари шартли озод қилинади, 39 нафарига тайинланган жазо енгилроқ жазо билан алмаштирилади, бошқача қилиб айтганда, 212 нафар шахс жазони ижро этиш муассасаларидан озод қилинади. Шунингдек, 14 нафар шахсга тайинланган озодликдан маҳрум этиш жазосининг муддатлари қисқартирилади.

Афв этилганларнинг 40 нафарини 60 ёшдан ошган шахслар, 39 нафарини чет эл фуқаролари, 37 нафарини аёллар, шунингдек, 51 нафарини тақиқланган ташкилотлар фаолиятида қатнашган шахслар ташкил этади.

Бу воқеа юртимизда олиб борилаётган инсонпарварлик сиёсатининг, халқимизга хос бағрикенглик, кечиримли бўлиш, олижаноблик ва меҳр-мурувват кўрсатиш каби эзгу фазилатларнинг муборак рамазон ойида янада юксак намоён бўлганлигининг амалий ифодасидир.

Фармон ижроси юзасидан афв этилган шахсларни оиласи ва яқинлари бағрига қайтариш, ижтимоий ҳаётга мослашиб, фойдали меҳнат билан шуғулланишлари, соғлом турмуш тарзини йўлга қўйиб, жамиятда муносиб ўрин топишлари учун уларга кўмак бериш юзасидан Бош прокуратура томонидан масъул вазирлик ва идоралар билан ҳамкорликда ишлар амалга оширилмоқда.