Тошкентдаги “Универсал” спорт мажмуасида МДҲга аъзо давлатлар дўстона армиялари ўртасидаги армия қўл жанги мусобақасига старт берилди. Бу ҳақда Мудофаа матбуот хизмати хабар берди.

Чемпионатнинг очилишида Тошкент ҳарбий округи ҳарбий хизматчиларининг, шунингдек, спортнинг турли йўналишлари бўйича Мудофаа вазирлиги спорт клубининг болалар спорти мактаби тарбияланувчиларининг кўргазмали чиқишлари томошабинлар эътиборига ҳавола этилди.

Ўзбекистон Республикаси Қуролли Кучлар Марказий ашула ва рақс ансамблининг чиқишлари ҳамда иштирокчи давлатларнинг халқ қўшиқлари ижро этилди.

Мусобақада Россия Федерацияси,  Беларусь, Қозоғистон, Қирғизистон, Тожикистон ҳамда Ўзбекистон Республикаларининг қўл жанги спорти усталари иштирок этмоқда.

10 сентябрь куни Ўзбекистон Қуролли Кучлари академиясида бўлиб ўтган қуръа ташлаш якунларига кўра дастлабки круг жангларида ўзбекистонлик ҳарбий хизматчилар татамига чиқмади. Иккинчи кругдан бошлаб етти вазн тоифасида Ўзбекистон Мудофаа вазирлиги ҳарбий хизматчилари баҳсларга киришди.