Буюк йўлнинг бошланиши доимо машаққатли кечади: дастлабки қадамларида Gemini чат-боти омадсизлик соясида қолгандек эди. Бироқ вақт ўз сўзини айтди — бугун у жавобларининг аниқлиги ва нафи билан ChatGPTни ҳам ортда қолдирмоқда. Бу муқаррар зафар яқинлигига, ҳадемай у ҳар бир фойдаланувчининг доимий ҳамроҳига айланиши мумкинлигига ишора.

Атиги икки йил аввал хавфли рақиб пайдо бўлиб, Googleнинг келажагини туман қоплади. Бутун технология оламини ағдар-тўнтар қилиб юборган OpenAI чат-ботига етиб олишга уриниб, қидирув гиганти ўз сунъий интеллектининг ҳали хом, чала ишланган талқинини Google.com платформасига шошилинч равишда чиқарди. Бироқ шошқалоқлик қимматга тушди: тизим ўз соҳибларини ноқулай аҳволга солиб, очиқ-ошкор хатолар қилар, масалан, одамларга тош ейишни ёхуд пиццага елим суртишни хотиржамлик билан маслаҳат берар эди.

Гўёки Google интернетдаги ҳукмронлигининг сўнгги кунларини ўтказаётгандек эди.

Бугун эса Google сунъий интеллект соҳасидаги мусобақада шунчаки таъқибчи эмас, балки узил-кесил ғалаба қозонажак етакчи сифатида қаралмоқда. Бу Кремний водийсида саноқли ойларда ҳамма нарса рўй бериши мумкинлигига яққол мисол.

Ўтган сешанба куни дастурчилар учун ўтказилган Google I/O конференциясида компания муҳим маълумотни эълон қилди: бор-йўғи бир йил ичида Gemini чат-боти фойдаланувчиларининг сони икки баробардан зиёдга ўсиб, 900 миллион нафарга етди. Бу кўрсаткич OpenAI томонидан маълум қилинган ChatGPTнинг фаол фойдаланувчилари сонига тенг, асосан бизнес-мижозларга мўлжалланган Anthropic компаниясининг Claude чат-боти трафигидан эса деярли 30 баробар кўпдир.

Сунъий интеллектга асосланган қимматбаҳо маълумотларни қайта ишлаш марказлари (дата-марказлар) сабабли ҳалигача кам фойда олаётган Anthropic ва OpenAI компанияларидан фарқли ўлароқ, Google ушбу технологияни ўзининг асосий даромад манбаи — онлайн реклама орқали фаол монетизация қилиш йўлларини топмоқда. Охирги чоракда компаниянинг рекламадан даромади 16 фоизга ўсиб, 77 миллиард долларга етди — бунга кўп жиҳатдан маркетологларга фойдаланувчилар қизиқишларини аниқроқ таҳлил қилишда кўмаклашаётган сунъий интеллект сабабчи.

Тез орада Gemini ўз рақобатчисининг платформаси — Apple компаниясининг iPhone қурилмалари таркибий қисмига айланади. Шу йилнинг январ ойида Google ва Apple компаниялари Gemini тизими Appleнинг Siri овозли ёрдамчисининг янги талқинига пойдевор бўлишини эълон қилишди. Gemini аллақачон Android тизимидаги қурилмаларга ўрнатилганини ҳисобга олсак, Apple билан ҳамкорлик унга, таъбир жоиз бўлса, дунёдаги деярли барча смартфонларни эгаллаш имконини беради.

Google I/O конференциясида интернет-дўконларда сотувни ошириш учун сунъий интеллектга асосланган акциялар ва харид савати функциялари тақдим этилди. Шунингдек, Gemini орқали Google Docsда шахсийлаштирилган матнларни яратиш имконияти кенгайтирилмоқда.

«Агар мендан сунъий интеллект соҳасидаги ғолиб ким бўлишини сўрашса, Googleни танлардим», — дейди The New York Times газетасининг собиқ репортёри, технологик компанияларнинг сунъий интеллект соҳасидаги даромад учун кураши ҳақидаги китоб муаллифи Гэри Ривлин.

«Худди шу саволни бир ярим йил аввал берганингизда, менинг жавобим умуман бошқача чиқар ва мен Googleни кўрсатмасдим», — дея қўшимча қилди у.

Google компаниясининг Gemini билан қозонган муваффақияти ҳатто соҳа гиганти ҳам ўз етакчилик мавқеини сақлаб қолиш учун қисқа вақт ичида қанчалик тубдан ўзгариши мумкинлигини кўрсатмоқда. Бироқ худди шундай муаммога йўлиққан аввалги етакчиларнинг тарихи бошқача кечган.

Бундан тахминан 15 йил аввал Appleнинг iPhone ва Googleнинг Android экотизими пайдо бўлиши билан Microsoft шахсий компютерлар бозоридаги устуворлигини йўқотди ва Windows Phone тақдим этилиши ҳамда Nokiaнинг харид қилинишига қарамай, мобил технологиялар пойгасидан чиқиб кетди. Microsoft бизнес-мижозлар ва гейминг йўналишида фойда олишда давом этса-да, оддий фойдаланувчилар орасида номсиз юлдузга айланиб улгурди.

Google компанияси Geminiни алоҳида маҳсулот сифатида ривожлантириш ўрнига бутунлай бошқа йўлдан борди — сунъий интеллектни ўз ихтиёридаги барча асосий сервисларга улаб қўйди. Ҳозирда, бунинг устида бир вақтнинг ўзида, бир нечта жамоа ишлаяпти: улардан бири Geminiни Gmail почта хизматига, бошқаси Google Maps хариталарига мослаштирмоқда, учинчиси эса чат-ботнинг алоҳида иловаси устида бош қотирмоқда.

Googleнинг яна бир устуворлиги бор: бу сунъий интеллект имкониятларидан сайёҳлик соҳасида фойдаланишдир. Gemini — Google Flights ва Google Hotels хизматларига тўғридан-тўғри уланиш имконига эга ягона чат-ботдир. Бу унга авиачипталар ва тураржойларни бемалол қидириш имконини беради ва Geminiни амалда мукаммал виртуал сайёҳлик агентига айлантиради.

«Гап фақат моделнинг қанчалик мукаммаллигида эмас, унинг қаерда жойлашгани ҳамда одамлар учун Geminiни топиш, ундан фойдаланишни бошлаш ва манфаат олиш қанчалик осонлиги ҳам муҳим», — дея тушунтиради Creative Strategies тадқиқот фирмаси президенти Каролина Миланези.

Google ўз технологиясини ривожлантириш учун қўлидаги барча воситалардан тўлиқ фойдаланди. Компания сунъий интеллект томонидан яратилган жавобларни дунёдаги энг кўп кириладиган сайт — Google.com платформасининг доимий функциясига айлантирди ва ҳозирча фойдаланувчиларга бу функцияни ўчириб қўйиш имкониятини бермаяпти.

Ўша, одамларга тош ейишни тавсия қилган Gemini бугун таниб бўлмас даражада ўзгарган. Аммо мутлақо мукаммал, дейишга шошмаслик керак. The Times газетаси яқинда ўтказган таҳлил кўрсатишича, Google сунъий интеллекти тақдим этаётган жавоблар 90 фоиз ҳолатларда тўғри чиқмоқда. Компания эса бу тадқиқотга эътироз билдириб, ўз технологияси бундан аниқроқ ишлашини таъкидлади.

«Улар шундай қамровга эгаки, бундай имконият дунёдаги деярли ҳеч бир компанияда йўқ. Кейинги Google ким бўлади дейсизми? Катта эҳтимол билан бу Googleнинг ўзи», — дея хулоса қилди Ривлин.

Манба: The New York Times