Олимларнинг фикрича, яқин 10 йил ичида сунъий интеллект ва замонавий технологиялар ёрдамида ҳайвонларнинг ўзаро мулоқотини деярли тўлиқ тушуниш имконияти пайдо бўлиши мумкин.

Бугунги кунда тадқиқотчилар китлар, дельфинлар, қушлар, филлар ва бошқа кўплаб ҳайвонларнинг товушлари ҳамда хатти-ҳаракатларини таҳлил қилмоқда. Сунъий интеллект улкан ҳажмдаги маълумотларни солиштириб, бу сигналларда маълум қонуниятлар ва “тил” элементларини аниқлашга ҳаракат қилмоқда.

Агар мазкур тадқиқотлар муваффақиятли якунланса, инсоният илк бор миллионлаб бошқа тирик мавжудотларнинг қай тарзда мулоқот қилиши, хавф-хатар ҳақида қандай огоҳлантириши, болаларига нималарни “ўргатиши” ва ҳатто ҳиссиётларини қайси йўсинда ифода этишини тушунишга яқинлашади.

Эҳтимол, биз 300 минг йил давомида ёнимизда яшаб келган, аммо эътибор бермаган улкан ақл ва мулоқот оламини энди кашф этишни бошлаётгандирмиз. Бу нафақат илм-фан, балки инсоннинг табиатга бўлган қарашларини ҳам тубдан ўзгартириши мумкин.