Буни узоқ вақт фойдаланувчилардан яшириб келишди.

Муаммога биринчи бўлиб оддий фойдаланувчи эътибор қаратди

Декабр ойи бошларида «Reddit»нинг «TeckFire» никли фойдаланувчиси ўзининг «iPhone 6s» смартфони сезиларли даражада секин ишлай бошлаганига эътибор қаратди. У муаммо смартфон аккумуляторига боғлиқ деб тахмин қилди. Фойдаланувчининг фикрича, тизим мустақил равишда процессор тезлиги частотасини пасайтиради. Аккумулятор алмаштирилганидан кейин қурилма тезлиги икки бараварга ошган.

Смартфон тезлигини синовдан ўтказувчилар бу тахминни тасдиқлашди

«TeckFire»нинг блогпости нафақат оддий фойдаланувчилар, балки мутахассислар эътиборини ҳам тортди. Процессорлар тезлигини баҳоловчи мутахассис, «Geekbench» синтетик тести муаллифи Жон Пул ўзининг мустақил тадқиқотларини бошлаб юборди. Мутахассис «iPhone 6s» процессори тезлигини «iOS»нинг турли талқинларида синаб кўрди. Синовларда «iOS»нинг 10.2.1 ва 11.2 талқинларидаги смартфонлар унинг эски дастуридаги қурилмаларига нисбатан сезиларли равишда тез ишлагани аниқланди. Демак, процессорнинг тезлик частотасини пасайтириш имконияти қарийб бир йил аввал — «iOS 10.2.1» чиқиши билан пайдо бўлган. Ўша янгиланишда «iPhone 6s»  ва «6s»да аккумуляторлар иши оптималлаштирилгани эълон қилинганди.

«Apple» эски «iPhone»ларда ишчанлик атай секинлаштирилганини тан олди

Жон Пулнинг мақоласидан кейин бир неча кун ўтиб, «Apple» расмий изоҳ берди. Компания вакилларининг тан олишича, «iOS»да ҳақиқатанам аккумулятор эскирганида қурилма ишчанлиги пасайиши функцияси ўрнатилган. Ва бу шунчаки яхши ниятда, «фойланувчилик тажрибасини ошириш учун» қилинган экан. «Гап фақат қурилманинг ишчанлигида эмас, балки унинг яроқлилик муддатида ҳам кетмоқда. Литий-ионли аккумуляторлар паст ҳароратда, қуввати оз қолганида ва эскирганида етарли ток билан таъминлай олмайди. Бу қурилманинг кутилмаганда ўчиб қолишига олиб келиши мумкин», дейилади расмий изоҳда.

Шу тарзда «iPhone»нинг хизмат муддати бир йилдан ошмайди

Компания изоҳида бир қизиқ банд бор, унда қайси қурилмалар шундай «ўзига хослик» билан таъминлангани келтирилган. «Ўтган йили биз  «iPhone 6s»  «6s» ва «SE» қурилмаларига шундай функцияни киритгандик. Бу йил «iOS 11.2» дастурли «iPhone 7»га бу функцияни қўшдик ва кейинги йилларда ҳам бу ишни давом эттирамиз», дейилади изоҳда. Демак, эндиликда ҳар бир «Айфон» бир йиллик хизматни ўтагач, процессор тезлиги «кесила» бошлайди, жумладан, 12 миллион сўмлик «iPhone X»да ҳам. Ва максимал даражада «фойланувчилик тажрибасини ошириш учун» ё қурилма аккумуляторини алмаштириш ёки янги «Айфон» сотиб олиш керак.

«Ўзига хослик»ни ҳар қанча яширишга уринишган

«iOS» учун иловалар тайёрловчи Марко Армент (Marco Arment)нинг сўзларига кўра, у ва унинг ҳамкасблари фойдаланувчиларни қурилманинг ишчанлиги пасайиши мумкинмас деб ишонтириб келишган. «Apple» тизимнинг барча сирларини очмагани учун у ўз сўзларига тўлиқ ишонч ҳосил қила олмаган. «Эски  «iPhone»ларнинг яширинча секинлаштирилиши, ҳар қандай сабаблардан қатъи назар, компания обрўсига йиллар давомида таъсир кўрсатиб туради», — дея мутахассис «Twitter» саҳифасида қайд қолдирган.

Муаммонинг ҳақиқий сабаби ҳамон сирлигича қоляпти

Расмий изоҳ берилганига қарамай, «Apple»га ҳамон саволлар кўп. Нега корпорация фойдаланувчилар камчиликни аниқлаганидан кейингина «янги функция»ни ошкор қилди? Нима учун фойдаланувчилар бу функция бир йил ишлашига ишонишлари керак? Эски «Айфон»ларнинг секинлашиб қолиши янгилик эмас. Мантиқан олиб қаралганда, «Apple»нинг бундай яширин иши аслида фойдаланувчиларни ҳар йили янги талқиндаги смартфон харид қилишга мажбурлаш эмасми?

Бошқа ишлаб чиқарувчиларчи?

Литий-ионли аккумуляторлар — барча смартфонларнинг нозик нуқтаси. Исталган телефонда маълум вақт ўтган батарея қувват манбаи кучсизланади, бу муаммо билан бошқа компаниялар қандай курашаётгани номаълум. Эҳтимол, ўз қурилмалари ишчанлигини яширинча тушириб юбораётган фақатгина «Apple» эмас...