O‘zbekiston Respublikasi va Xitoy Xalq Respublikasi oliy ta’lim muassasalari o‘rtasidagi o‘zaro almashuvlarni rivojlantirish, bu boradagi ilg‘or tajribani o‘zlashtirish yo‘lida muzokaralar o‘tkazish maqsadida Shimoliy Xitoy texnologiya universiteti vitse-prezidenti, professor Shei Zi Li xonim boshchiligidagi delegatsiya a’zolari Andijon mashinasozlik institutiga tashrif buyurishdi. Bu haqda «Xabar.uz»ga Andijon mashinsozlik instituti axborot xizmatidan ma’lum qilishdi.

Xitoylik mehmonlar Andijon mashinasozlik instituti professor-o‘qituvchilari bilan uchrashib, o‘zaro tajriba almashish, ilmiy tadqiqot ishlarni hamkorlikda olib borish, ilmiy loyihalarini tayyorlash kabi bir qator masalalarda o‘zaro fikr almashishdi.

Tashrif davomida Shimoliy Xitoy texnologiya universiteti va Andijon mashinasozlik instituti o‘rtasida Hamkorlik to‘g‘risidagi memorandum imzolandi. Unga ko‘ra, ikki oliy ta’lim muassasalari o‘rtasida qo‘shma fakultet ochish, talabalarni hamkorlikda o‘qitish, qo‘shma diplom berish kabi masalalari rejalashtirib olindi.