Sirdaryo viloyati bojxona boshqarmasining Kontrabanda va bojxona qoidalari buzilishiga qarshi kurashish bo‘limi xodimlari boshqa huquqni muhofaza qiluvchi idoralar bilan hamkorlikda qo‘shni davlatdan O‘zbekistonga «Xovosobod» chegara bojxona posti orqali tovar-moddiy boyliklar mayda partiyalarda olib o‘tilishiga qarshi kurashish bo‘yicha tadbir o‘tkazishdi.

Fuqaro X.Z. ning yashash xonadonidan chiqib, Xovos-Toshkent yo‘nalishi bo‘ylab harakatlanib ketayotgan fuqaro N.A. boshqaruvidagi «Opel» rusumli yengil avtotransport vositasi kuzatuvga olinib, Yangiyer shahar IIB YHXB blok-postida to‘xtatilib, xolislar ishtirokida avtomashina saloni va yukxonasi ko‘zdan kechirildi.

Natijada, ushbu avtomashinada xorijda ishlab chiqarilgan, hech qanday hujjatlari bo‘lmagan umumiy qiymati 18 000 000 so‘mlik, jami 12 dona «Canon 1/3» rusumli printerlar borligi aniqlandi.

Yuk egasi esa ashyoviy dalil sifatida olingan mazkur 12 dona printerni postdan birinchi marotaba harakatlanayotgan fuqarolarni ma’lum haq evaziga yollab, «Xovosobod» chegara bojxona posti orqali bo‘lib-bo‘lib olib o‘tilishini tashkillashtirganini ma’lum qildi.

Davlat bojxona qo‘mitasi xabar berishicha, hozirda ushbu holat yuzasidan tekshiruv harakatlari olib borilmoqda.