АҚШ ўқ-дори захиралари камайгани ҳақидаги маълумотлар Эронни руҳлантириши мумкин. 

Американинг CNN телеканали эълон қилган таҳлилий мақолада, АҚШнинг Эрон билан давом этаётган уруш туфайли ўқ-дори захиралари кескин камайгани ҳақида тарқалган маълумотлар Вашингтонни Теҳрон олдида заиф кўрсатиши ва бу Эронни янада дадил ҳаракат қилишга ундаши мумкинлиги қайд этилди.

CNN хавфсизлик таҳлилчиси Алекс Плитсаснинг фикрларига таянган хабарда, АҚШнинг ўқ-дори захиралари қисқараётгани ҳақидаги маълумотлар Эронни «руҳлантириши» мумкинлиги таъкидланган.

Айни пайтда Атлантика кенгашининг Терроризмга қарши кураш бўйича директори вазифасида ҳам фаолият юритаётган Плитсаснинг айтишича, АҚШ армияси муҳим ракетага қарши мудофаа тизими учун мўлжалланган ракеталарнинг қарийб 80 фоизини сарфлаб бўлгани ҳақидаги ҳисоботлар мамлакатнинг Эрон олдидаги мудофаа имкониятлари чекланганини англатиши мумкин.

Плитсас мазкур маълумотларни «сиёсий мақсадда уюштирилган ахборот сиздирилиши» деб баҳолаб, бундай ҳолат АҚШни «айни пайтда жуда хавфли вазиятга» солиб қўйганини таъкидлади.

Унинг қайд этишича, АҚШ Президенти Доналд Трамп билдирган фикрдан фарқли равишда, сарфланган ўқ-дорилар захирасини қайта тўлдириш анча вақт талаб қилади.

«Шу боис қисқа муддатда ишлаб чиқариш қувватларида бўшлиқ сақланиб қолади ва ўқ-дори танқислигини бартараф этиш зарурати юзага келади», – деди Плитсас.

Таҳлилчига кўра, шу даврда Эрон ўз ҳужумларини кучайтирган. «Менимча, бу жасоратнинг сабабларидан бири – улар АҚШнинг ўқ-дори захиралари камайганига ва бундай шароитда мамлакатга ҳимояланиш қийин бўлишига ишонаётганидир», – деди у. 

АҚШ матбуоти ўқ-дори муаммосини ошкор қилди, Трамп эса буни «хиёнаткорона ҳаракат» деб атади.

The Washington Post газетасининг мавзудан хабардор манбаларга таяниб ёзишича, ўтган ҳафта Президент Доналд Трамп Кэмп-Дэвид қароргоҳида бўлиб ўтган ҳукумат йиғилишида Мудофаа вазири Пит Хегсетдан ўқ-дори танқислиги бўйича тушунтириш талаб қилган.

Хабарда таъкидланишича, айнан шу муаммо Трампнинг Эронга нисбатан «жуда қаттиқ зарбалар» бериш таҳдидларига қарамай, янги ҳужумларни бекор қилишига сабаб бўлган. CNN ҳам ўз манбаларига таяниб тарқатган хабарда, узоқ масофали юқори аниқликдаги бошқариладиган ракеталар ҳамда ҳаво мудофааси тизими учун мўлжалланган ракета-тутқичлар танқислиги Трампнинг Эрон билан боғлиқ ҳарбий стратегиясига таъсир кўрсатганини маълум қилди. Шунингдек, АҚШ армияси THAAD ракетага қарши мудофаа тизими учун ажратилган ракеталар захирасининг тахминан 80 фоизини ишлатиб бўлгани қайд этилди. CBS News телеканалига икки манбанинг билдиришича, АҚШ Эрон билан уруш давомида мавжуд узоқ масофали юқори аниқликдаги бошқариладиган ракеталар захирасининг катта қисмини сарфлаб бўлган. Reuters ахборот агентлиги эса АҚШ Эрон билан беш ойдан буён давом этаётган урушда PrSM ва ATACMS русумли узоқ масофали ракеталарнинг деярли барчасини, Tomahawk қанотли ракеталари захирасининг эса қарийб ярмини ишлатиб бўлганини хабар қилди.

Президент Доналд Трамп эса ижтимоий тармоқдаги саҳифасида мамлакат ихтиёрида ҳали ҳам катта миқдорда ўқ-дори мавжудлигини таъкидлади. Унинг сўзларига кўра, ўқ-дорилар ишлаб чиқарилиши узлуксиз давом этмоқда. Шу билан бирга, армия заифлашганини англатувчи бу каби «хиёнаткорона» маълумотларни оммага сиздирган шахслар аниқланиши ва улар узоқ муддатли қамоқ жазосига тортилиши мумкинлигини билдирди.