Америкалик болалар ёзувчиси Коури Ричинс 4 миллион долларлик мерос учун эрини заҳарлаганликда айбланмоқда, деб хабар берди NBC News.

Тергов маълумотларига кўра, Коури Ричинс турмуш ўртоғи Эрик Ричинсга ўлим дозасидан беш баробар кўп фентанил қўшилган коктейл берган. Қотилликка аёлнинг 1 миллион доллардан ортиқ қарзи ва эрининг 4 миллион долларлик бойлигига эга чиқиш истаги сабаб бўлгани айтилмоқда.

Маълумот учун: аёл эрининг ўлимидан бир йил ўтиб, «Сен мен биланмисан?» деб номланган китобни ёзиб, нашр этган. Китобда отаси вафот этган боланинг қайғуни қандай енгиши ва отасининг «фаришта» бўлиб уни кузатиб туриши ҳикоя қилинади. Коури Ричинс ушбу китобни фарзандларига эрининг «кутилмаган» ўлимини тушунтириш ва бошқа етим қолган болаларга ёрдам бериш учун ёзганини даъво қилган. Ҳатто маҳаллий телеканалларда чиқиш қилиб, китобни тарғиб ҳам қилган.

Бироқ, тергов хулосаларига кўра, айнан шу китобни нашр этиши унинг жиноятни яшириш ва «қайғу чекаётган бева» образини яратиш режасининг бир қисми бўлган бўлиши мумкин.

Ёзувчи айбига иқрор бўлгани йўқ. Унинг адвокатлари заҳар марҳумнинг организмига қандай тушгани бўйича аниқ далиллар йўқлигини даъво қилмоқда. Суд давом этмоқда.