Эстония парламенти учдан икки қисмдан кўпроқ овоз билан 51 ёшли Юлле Мадизени мамлакатнинг янги президенти этиб сайлади.

Мадизе — профессионал ҳуқуқшунос, у сўнгги 11 йил давомида Эстониянинг олий юридик арбитри, яъни адлия канцлери лавозимида фаолият юритиб келган.

Эстонияда президент асосан рамзий лавозим ҳисобланиб, ички ва ташқи сиёсатни белгиламайди — бу ваколатлар тўлиқ парламент ва ҳукуматга тегишли.

Конституцияга кўра, давлат раҳбари мамлакатни хорижда вакил сифатида танитади, ички сиёсатдаги энг муҳим вазифаси эса парламент томонидан қабул қилинган қонунларни имзолаш ҳисобланади.

Мадизедан олдинги президентлар вақти-вақти билан жамиятда баҳсли деб топилган қонунларни рад этиб, парламентга қайтариб турган.

Ўз либерал қарашлари билан ажралиб турувчи Юлле Мадизе чоршанба куни парламентдаги нутқида бюрократия ва ҳаддан ташқари тартибга солиш масалаларига тўхталди. Унинг фикрича, бу омиллар тадбиркорлик ташаббусларини бўғиб қўймоқда ва одамларнинг ўз давлати ҳақидаги тасаввурини ёмонлаштирмоқда.

Янги сайланган президент шу йил 11 октябрдан ўз вазифасини бажаришга киришади. Ўша куни амалдаги президент Алар Карис ўз лавозимини тарк этади. Карис иккинчи муддатга ўз номзодини қўйиш ҳуқуқига эга бўлса-да, сайловда қатнашишдан воз кечган.