Полша президенти Карол Навроцкий ва бош вазир Доналд Туск ижтимоий тармоқда баҳслашиб қолишди.

Икки раҳбар ўртасидаги келишмовчиликка президент девони томонидан Иккинчи жаҳон уруши давридаги тарихий воқеаларга бағишлаб Х тармоғида қолдирилган пост сабаб бўлди. Баҳс 1939 йил 17 сентябрда содир бўлган — собиқ Иттифоқнинг Полшага бостириб кирганлигининг 87 йиллиги муносабати билан ўтказилган хотира тадбиридан сўнг бошланди.

Навроцкий ўз нутқида поляклар тарихда ҳудудларини йўқотган бўлса-да, ўзлигини ва Ватанини ҳеч қачон бой бермаганини таъкидлади. Президент довони ушбу иқтибосни ижтимоий тармоққа жойлаштирди.

Туск бу сўзларни нотўғри тушуниб, президент баёнотини кескин танқид қилди. У «Биз бир қарич еримизни ҳам бировга бермаймиз» дея, Навроцкийни ушбу постни ўчириб ташлашга чақирди.

Бунга жавобан президент бош вазирга ўзининг тарихчи эканлигини эслатиб, гап айнан 87 йил олдинги фожиали тарихий воқеалар ҳақида кетганини тушунтирди. Қўшимчасига, у ҳукумат раҳбарини ижтимоий тармоқларда баҳслашгунча, ёнилғи нархини тушириш бўйича қонун лойиҳаси билан шуғулланишга чақирди.

Полша матбуотининг ёзишича, президент нутқидан олинган иқтибос контекстдан юлиб олингани сабабли икки раҳбар ўртасида мана шундай тортишув келиб чиққан.