Россия президенти Владимир Путин АҚШ президенти Дональд Трамп ва Хитой раҳбари Си Цзиньпинга Украинадаги урушни муҳокама қилиш учун уч томонлама учрашув ўтказишни таклиф қилди. Бу ҳақда The Wall Street Journal ўз манбаларига таяниб хабар бермоқда.

Нашр маълумотига кўра, учрашувни 18–19 ноябр кунлари бўлиб ўтадиган Осиё-Тинч океани иқтисодий ҳамкорлиги (АТЭС) саммити доирасида ташкил этиш таклиф қилинган. Путиннинг мақсади урушни Москва учун қулай шартларда якунлаш бўйича келишувга эришиш экани айтилмоқда.

WSJ манбасининг билдиришича, Россия раҳбари бу таклифни 9 октябр куни Трамп билан телефон орқали мулоқоти давомида илгари сурган. Ўша суҳбатда Россия дизел ёқилғисини етказиб бериш масаласи ҳам келишилгани хабар қилинганди.

Трамп ҳозирча учрашувга розилик бермаган. Бироқ АҚШнинг юқори мартабали амалдори унинг Украинадаги урушни тугатиш истагини инобатга олганда, таклифни ижобий қабул қилиши мумкинлигини билдирган.

Хитой томонига таклиф дипломатик каналлар орқали етказилган. Пекин Трамп рози бўлган тақдирда учрашувга қаршилик билдирмаслигини маълум қилган.

Кремль матбуот котиби Дмитрий Песков ҳам бундай учрашув имконияти муҳокама қилинаётганини тасдиқлаган. Бироқ унинг таъкидлашича, ҳозирча саммитнинг ўтказилиши ёки кун тартиби бўйича аниқ келишув мавжуд эмас.