Жеффри Эпштейн билан алоқадорликда гумон қилинган Турбёрн Ягланд ўз жонига қасд қилишга уринди. Бу ҳақда ўз манбаларига асосланиб iNyheter нашри хабар берди.

Турбёрн Ягланд — Норвегия собиқ бош вазири ҳамда Европа Кенгашининг собиқ бош котиби.

75 ёшли Ягланд оғир аҳволда шифохонага етказилган. Сиёсатчи ўз жонига қасд қилиш ҳаракатини бир ҳафта олдин амалга оширгани айтилмоқда.

Норвегия матбуоти тахминларига кўра, ушбу ҳодиса Ягландга нисбатан бошланган тергов билан боғлиқ. Унинг исми оммага очиқланган «Эпштейн файллари»да қайд этилган. Ўша даврда Ягланд Нобел қўмитасига раҳбарлик қилган (2009–2015) ва Европа Кенгаши бош котиби (2009–2019) бўлган.

Норвегия коррупцияга қарши курашиш бошқармаси Ягланднинг хатти-ҳаракатларини текшириш учун асослар етарли эканини маълум қилган. Сиёсатчи эса айбловларни рад этиб, тергов билан ҳамкорлик қилишга тайёрлигини билдирган.

Аввалроқ Эпштейн иши бўйича хизмат мавқеини суиистеъмол қилишда гумонланаётган собиқ шаҳзода Эндрю Маунтбеттен-Виндзор ҳибсга олинган эди. Карл III нинг укаси сўроқдан сўнг қўйиб юборилган, бироқ ҳамон тергов остида қолмоқда.