Қозоғистон президенти Қосим-Жўмарт Тўқаев Омскда ўтган учрашувда Россия президенти Владимир Путинга Украина можаросини «музлатиш»ни таклиф этди. Тўқаев мазкур урушда ёшлар ҳалок бўлаётганини, бу Россия учун ҳам, Украина учун ҳам нохуш ҳолат эканини таъкидлади. 

Украина ташқи ишлар вазири Андрий Сибига Қозоғистон президенти Қосим-Жўмарт Тўқаевнинг Украина можаросини музлатиш ва Истанбул келишувларига қайтиш таклифини қўллаб-қувватлади. У ижтимоий тармоқлардаги саҳифасида тегишли баёнотни эълон қилди.

«Биз Президент Қосим-Жўмарт Тўқаевнинг Путинга урушни тўхтатиш вақти келгани ҳақидаги чақириқларини қадрлаймиз. Бу реалистик, ўз вақтида қилинган ва оқилона мурожаат», деб ёзган дипломат.

Тўқаев Путин билан учрашувда Украина можаросининг тугаши бўйича Европа ва Қўшма Штатлардан кўплаб сигналлар олаётганини билдирган.

Аммо Қозоғистон президенти таклифи Москва томонидан ижобий қабул қилинмаган. Кремл Украинанинг уруш бўйича позицияси сабаб можарони ҳозир якунлаб бўлмаслигини билдирган. Ўз навбатида, Россия президенти матбуот котиби Дмитрий Песков Қозоғистон раҳбарининг Украина бўйича изчил позицияси борлигини, аммо бу Москва бунга қўшилишини англатмаслигини айтди.