АҚШ президенти Дональд Трамп Эронга ядровий дастур бўйича келишув тузиш учун энг кўпи билан 10–15 кун вақт борлигини маълум қилди. У бу ҳақда журналистлар билан суҳбатда, самолёт бортида туриб баёнот берган. Брифинг ёзуви C-Span порталида эълон қилинган.

«Менимча, 10–15 кун етарли бўлиши керак», – деди Трамп.

19 февраль куни Вашингтонда бўлиб ўтган Тинчлик кенгашининг биринчи йиғилишида ҳам Трамп Теҳронни келишув бўлмаса, «ёмон оқибатлар» кутаётгани билан огоҳлантирган. Бироқ у айнан қандай чоралар кўрилишини очиқламаган.

Шу билан бирга, Reuters агентлиги хабар қилишича, Эрон БМТ Бош котиби Антониу Гутерришга йўллаган мактубида уруш бошлаш нияти йўқлигини билдирган. Бироқ «ҳарбий тажовуз» бўлган тақдирда, мамлакат «қатъий ва мутаносиб жавоб қайтаришини» маълум қилган. Мактубда айтилишича, минтақадаги «душман кучларининг барча базалари ва объектлари қонуний нишон» сифатида кўрилади.

CBS телеканали эса АҚШ ҳарбийлари 21 февраль куни Эронга зарба беришга тайёр экани ҳақида президентга ҳисобот берганини маълум қилди. Бироқ телеканалга кўра, Трамп ҳозирча якуний қарор қабул қилмаган.

Reuters сунъий йўлдош тасвирларига таяниб, Теҳрон АҚШ билан муносабатлар кескинлашган бир пайтда ҳарбий полигонлар ва бошқа объектларни мустаҳкамлаётганини ёзган.

17 февраль куни Женевада Америка-Эрон музокараларининг иккинчи босқичи ўтказилди. The Wall Street Journal нашрининг ёзишича, Эрон бойитилган ураннинг бир қисмини учинчи томонга, масалан Россияга топширишни таклиф қилган. Шунингдек, Теҳрон уранни бойитишни тўхтатиш ва АҚШ билан бизнес келишувлар тузишга тайёр эканини билдирган. Нашрга кўра, бу таклифлар эҳтимолий ҳарбий зарбани олдини олиш мақсадида илгари сурилган.

Музокаралар арафасида Трамп яна бир бор Эрон ўз ядровий дастурига эга бўлиши мумкин эмаслигини таъкидлаган. Эрон ташқи ишлар вазири Аббос Ароқчи эса Женева учрашуви олдидан ижтимоий тармоқларда «адолатли келишув» муҳокама қилиниши мумкинлигини, аммо «таҳдидлар олдида таслим бўлиш музокаралар мавзуси эмас»лигини ёзган.

WSJ таҳлилига кўра, Эрон таклиф қилаётган ён беришлар Вашингтонни қониқтирмаслиги мумкин. Айрим маълумотларга кўра, 2025 йил июнь ойидаги АҚШ зарбаларидан сўнг Эронда уранни бойитиш жараёни тўхтаган, аммо Теҳрон ишлаб чиқариш салоҳиятини сақлаб қолишни талаб қилмоқда.

Байден ва Обама маъмуриятлари даврида Эрон билан музокараларда иштирок этган Ричард Нефьюнинг фикрича, АҚШ Теҳронга Венесуэла сценарийсини таклиф қилмоқда – яъни ё шартларга рози бўлиш, ёки ҳарбий босимга дуч келиш.

Минтақадаги вазият ҳозир ноаниқлигича қолмоқда. Томонлар ўртасида дипломатик музокаралар давом этаётган бўлса-да, ҳарбий ҳаракатлар эҳтимоли ҳам истисно қилинмаяпти.