2025 йил 2 сентябрдан автомобилларни Пискент синов мажмуасида синовлардан ўтказиш амалиёти тўхтатилади.

Бу ҳақда Ўзбекистон техник жиҳатдан тартибга солиш агентлиги маълум қилди.

Агентликка кўра, мазкур тартиб кучга кирган пайт, яъни 2024 йилнинг 1 ноябрь ҳолатига мамлакатда фақатгина 3 та дилерлик маркази фаолият юритган ва улар атига 15 та автомодел учун турини маъқуллаш ҳужжатини олган, холос. Ўз навбатида, таҳлил натижалари республикага техник регламентга мувофиқ транспорт тури маъқулланмаган енгил автомобилларнинг импорт қилинганини кўрсатган.

Шу сабабли Пискент синов мажмуасида автотранспорт воситалари Вазирлар Маҳкамаси томонидан тасдиқланган техник регламентга мувофиқ синовлардан ўтказилган.

Ҳозирги кунда эса, 21 та хорижий компанияларнинг расмий дилерлари ўз фаолиятини бошлаган ва 100 дан ортиқ автомобил русумларига турини маъқуллаш ҳужжатлари расмийлаштирилган.

«Бунинг натижасида, истеъмолчиларга сифати ва хавфсизлиги таъминланган, ҳамда кафолатланган автотранспорт воситаларини етказиб бериш тизими такомиллаштирилди. Натижада истеъмолчиларга расмий дилерлардан турли русумдаги автотранспорт воситаларини харид қилиш имконияти яратилди.

Шу муносабат билан, республикамизда расмий дилерлар ва сервис марказлари сони кескин ошганлиги ҳамда истеъмолчиларнинг расмий дилерлар билан ишлаш амалиёти жорий этилганлигини инобатга олиб, 2025 йил 2 сентябрдан автомобилларни Пискент автополигонида синовдан ўтказиш амалиёти тўхтатилади», – дейилади Агентлик ахборотида.