Ўзбекистон Республикаси Президенти Наманган шаҳар Давлат хизматлари марказига ташрифи давомида мазкур муассасанинг учинчи қаватида жойлашган «Оила» илмий-амалий тадқиқот маркази вилоят бўлими ҳамда Наманган инновация маркази фаолияти билан ҳам танишган эди.

— Хотин-қизлар қўмиталари вакиллари энди йиғилишма-йиғилиш юрмайди, ўз участкасидаги аёллар муаммолари билан шуғулланади. Бу соҳадаги энг катта иллат — хотин-қизлар қўмиталари ўз ортидан ҳеч кимни эргаштиролмайди. Бунга барҳам берилсагина, жамиятимиздаги маънавий муҳит ўзгаради, хотин-қизлар муаммолари камаяди, — деди Шавкат Мирзиёев.

Давлат раҳбари хотин-қизлар ишсизлигининг олдини олиш, кўрсатилаётган тиббий хизматни, уй-жой шароитини яхшилаш, аёллар тадбиркорлигини ривожлантириш юзасидан мутасаддиларга зарур топшириқлар берди.

Президент ташрифидан кейин «Оила» илмий-амалий тадқиқот марказининг Наманган шаҳар ва 11 туман бўлимларига «Spark» русумли автомашиналар совға қилинди. Бу ҳақда «Namnews.uz» портали хабар берди.