Қонун (ЎРҚ–1116-сон, 2026 йил 4 февраль) билан Маъмурий жавобгарлик тўғрисидаги кодексга қўшимча ва ўзгартиришлар киритилди.

Унга кўра, йўл ҳаракати хавфсизлиги билан боғлиқ кам аҳамиятли ҳуқуқбузарликлар учун маъмурий огоҳлантириш жазосини қўллаш тартиби белгиланди.

Маъмурий огоҳлантириш ҳуқуқбузарлик содир этган шахсни қонунга хилоф хатти-ҳаракатларга йўл қўймаслик тўғрисида расман огоҳлантириш ва танбеҳ беришни назарда тутади. У ёзма ёки электрон шаклда расмийлаштирилади.

Мазкур чора Кодекснинг 125-моддаси 1 ва 2-қисмлари, 128¹, 128², 128⁶, 135¹-моддалари ҳамда 138-моддаси 1 ва 2-қисмларида кўзда тутилган ҳуқуқбузарликларни содир этган шахсларга нисбатан қўлланилиши мумкин.

Бунда ҳуқуқбузар шахс ўз қилмишидан чин кўнгилдан пушаймон бўлган, шунингдек, Кодексда назарда тутилган бошқа ҳуқуқбузарлик аломатлари мавжуд бўлмаган ҳолларда, маъмурий жазо қўллашга ваколатли орган томонидан огоҳлантириш бериш мумкин.

Қонунга мувофиқ, маъмурий огоҳлантириш айни бир шахсга нисбатан бир йил давомида бир мартадан ортиқ қўлланилишига йўл қўйилмайди.