2025 йил 8-10 август кунлари Хивада «Қовун сайли» фестивали бўлиб ўтди. Бу ёрқин гастрономик ва маданий тадбир мамлакат ва дунёнинг турли бурчакларидан келган сайёҳлар учун муҳим диққат марказига айланди ҳамда маҳаллий ва хорижий ОАВ вакилларини эътиборини тортди.

Тадбир Туризм қўмитаси ва Хоразм вилояти ҳокимлиги ҳамкорлигида ташкил этилди ҳамда «Ичан қалъа» тарихий мажмуаси ва «Арда Хива» замонавий сайёҳлик марказидек ноёб жойларда ўтказилди.

2024 йилда фестивалга 500 мингдан ортиқ меҳмон, жумладан маҳаллий аҳоли ва хорижий сайёҳлар ташриф буюрган бўлса, 2025 йилда меҳмонларнинг умумий сони 1 миллиондан ошди, уларнинг 300 га яқини хорижий сайёҳлар эди. Бундай сезиларли ўсиш фестивалнинг агротуризмни ривожлантириш ва Хоразм вилоятининг сайёҳлик салоҳиятини мустаҳкамлаш платформаси сифатидаги аҳамиятини яққол кўрсатди.

Фестивалнинг барча кунлари юлдузларнинг ёрқин чиқишлари ҳамда маҳорат дарслари, кўргазмалар ва танловларни ўз ичига олган бой кўнгилочар дастур билан ўтказилди. Таклиф этилган санъаткорлар орасида афсонавий Тоҳир Содиқов, машҳур хонанда JONY, DJ Meaghan, Мустафо Жежели, Ҳамдам Собиров, Ғуломжон Ёқубов, Гулсанам Мамазоитовалар бўлди. Тантанали ёпилиш маросими давомида эса Роза Зергерли ўз чиқиши билан меҳмонларга завқ бағишлади.

Фестивалнинг 19 та стендида Хоразм вилояти туманлари, етакчи фермер хўжаликлари ва бошқа иштирокчилар ўнлаб қовун навларини, шунингдек, вилоятнинг маҳсулотлари, технологиялари ва ютуқларини намойиш этдилар. Меҳмонлар турли хил қовунлардан татиб кўриш, ишлаб чиқарувчилар билан суҳбатлашиш ва Хоразмнинг қишлоқ хўжалиги анъаналари билан яқиндан танишиш имкониятига эга бўлдилар.

Фестивалнинг якуний қисмида ўтказилган энг яхши иштирокчиларни тақдирлаш тантанали маросимида Хоразм вилояти ҳокими Жўрабек Раҳимов, Туризм қўмитаси раиси Умид Шадиев, Ўзбекистонда фаолият юритаётган дипломатик корпус вакиллари ҳамда воқеани ёритган етакчи маҳаллий ва хорижий оммавий ахборот воситалари журналистлари иштирок этдилар. Фестиваль ғолиблари эълон қилинди: учинчи ўринни 15 та ташкилот, иккинчи ўринни Янгибозор тумани ва «UzAuto Motors» акциядорлик жамияти, биринчи ўринни Хива шаҳри эгаллади, бош соврин эса Урганч шаҳрига насиб этди.

«Қовун сайли» фестивали Хоразм вилоятининг юқори сайёҳлик салоҳиятини яна бир бор тасдиқлади ва агротуризмни ривожлантириш ҳамда минтақанинг замонавий ва меҳмондўст сайёҳлик маскани сифатидаги обрўсини мустаҳкамлаш йўлидаги муҳим қадам бўлди.