Шу йилнинг 20–24 март кунлари Ҳатай вилоятидан Туркия фуқаролари делегациясининг Ўзбекистонга ташрифи бўлиб ўтади.

«Дунё» ААнинг эслатишича, ушбу ташриф Ўзбекистон Президентининг Наврўз байрами муносабати билан илгари сурилган ва 2026 йил 29 январь куни бўлиб ўтган Олий даражадаги стратегик ҳамкорлик кенгашининг тўртинчи йиғилиши доирасида билдирилган ташаббусига мувофиқ ташкил этилмоқда.

Таъкидланишича, ташаббус Туркиядаги маҳаллий ОАВларда кенг ёритилган. Жумладан, «Haberler», «Ensondakika», «İlkhaber Gazetesi», «Sondakika» каби етакчи электрон нашрлар, шунингдек, «Ülke TV» ва «Bengü Türk» телеканаллари бўлажак ташрифни фаол ёритмоқда.

Хусусан, Ҳатай вилояти губернатори Мустафо Масатли ва вилоят аҳолисининг ташаккурномаси эълон қилиниб, унда Ўзбекистон томонига таклиф учун миннатдорлик билдирилган.

Маълум қилинишича, делегация таркибидан Туркия оммавий ахборот воситалари вакиллари ҳам ўрин олган бўлиб, улар ташрифнинг бориши ва Ўзбекистонда Наврўз байрами доирасида ўтказилаётган тадбирлар ҳақида Туркия жамоатчилигини мунтазам равишда хабардор қилиб боради.