Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

Ғайрат Йўлдош

Бешикдан қабргача илм изла!

Бир мурожаат изидан: аҳоли эътирозига сабаб бўлаётган йўл қачон таъмирланади?

Бир мурожаат изидан: аҳоли эътирозига сабаб бўлаётган йўл қачон таъмирланади?

Фото: «Xabar.uz»

Чет эл киноларини кўриб, биласизми, нимага ҳавас қиламан? Йўлларига. Ҳа, текис ва равон йўлларига, "қани эди бизда ҳам шундай йўллар бўлса эди" деб ҳавас қиламан.

Ҳаммамизга маълум биз автосаноатда бошиданоқ ён-атрофимиздаги давлатлардан фарқли равишда бошқа йўлдан кетдик. Ўз автосаноатимизни ташкил этиб, чет элдан келадиган эски машиналарнинг мамлакатимизга кириб келишини чеклаб қўйдик. Бу яхши иш бўлдими ёки ёмонми, билмайман, аммо кўчаларимизда эски шалағи чиқиб кетган автоуловлар камайиб, асосан ўзимизда ишлаб чиқарилган янги машиналарнинг юргани бу ҳақиқат.

Аммо мамлакатимизнинг аксар шаҳар ва қишлоқларида ана шу янги машиналарга мос йўлларнинг йўқлиги бироз одамнинг ҳафсаласини пир қилади. Тўғри-да, фалон пулга янги машинани олсанг-у, уни олиб бориб қишлоғингнинг тош ёки лой йўлларида, ёзда чанг, қишда эса лойга ботиб ҳайдасанг, алам қилмайдими? Ана шундай ҳолатларда қиммат машина минадиганларга раҳмим келади.

Қишлоқлардаги ички йўлларни ёзмай қўя қолай, аммо республика аҳамиятига эга кўпгина йўлларнинг ҳам аҳволи хароб бўлиб қолгани бугун ҳеч кимга сир эмас. Қуйидаги мурожаат ҳам ана шундай йўллари хароб аҳволда қолаётган инсонлар томонидан ёзилган.

"Республика аҳамиятига эга бўлган "Ургут-Булунғур йўлининг қишлоғимиз ўртасидан ўтган "Торинжак" ва "Испанза" участкаларидаги 4-5 км.лик қисмининг асфальти бузилиб, тош йўл бўлиб қолганига ҳам 15 йилдан ошди. Аммо уни таъмирлаш шу пайтгача ҳеч кимнинг эсига келмасди. 2017 йилда мамлакатимиз бўйлаб ҳар бир вилоятда, ҳар бир туманда қанча йўл асфальт қилиниши белгилаб берилганда қишлоқ аҳли ҳам ёки шу йўлдан фойдаланадиганлар ҳам "ниҳоят йўлимизни таъмирлаб беришади" деб хурсанд бўлгани ҳам рост.

Аммо улар беҳудага хурсанд бўлишган экан. 2017 йилда туман йўлсозлари ушбу йўлни батамом тоши чиқиб кетган жойларини бир қисмини, бир жойда 50 метр, яна бир жойда 100 метр дегандай асфальт қилишди. Қолган қисми қолиб кетди. Асфальти бироз тузук сақланган, аммо чуқур ўралари бор жойлар таъмирланмади. Бу йил ҳам қишлоқ аҳлининг бир неча бор қилган оғзаки мурожаатидан сўнг ўтган йилгидай йўлнинг асфальти батамом бузилиб кетган яна бир қисми асфальт қилинди. Яна бироз қисми ҳанузгача навбатини кутяпти. Ўтган йилдан қолиб кетган камида 15 йиллик чуқур ўралари ҳанузгача турибди.

Йўлнинг республика аҳамиятига эгалиги ва туман аҳолисининг катта қисми туман марказига чиқиш учун шу йўлдан фойдаланиши бу йўлни таъмирлашни кечиктириб бўлмаслигини, қолаверса, ушбу йўлнинг бор-йўғи 4-5 км. таъмирталаб экани бу йўлни осонгина таъмирлаб қўйиш мумкинлигини англатади. Аммо негадир йўлсозлар буларни инобатга олмаяптилар.

Охири йўлсозларнинг масъулиятсизлигидан безган қишлоқ одамларининг тавсияси билан 2018 йилнинг 13 сентябрь куни шу йўлнинг таъмирланиши юзасидан Президент порталига мурожаат қилишга мажбур бўлдим. Шундан сўнг орадан бироз ўтиб, туман йўл бошқармаси ходимлари мендан идораларига келиб-кетишни сўрашди. Шу ерда эслатиб ўтишни жоиз деб билдим, аслида ташкилот ходимлари муаммони жойига келиб ўрганишлари ва бартараф этишлари керак эмасмиди? Йўқ, Ургут тумани йўлсозлари шунчалик кучайиб кетишибдики, улар муаммоли йўл ҳақида Президент порталига мурожаат қилган менинг олдимга ўзлари келмай, мени идораларига чақиришяпти. Мен уларга керак бўлса, ўзларинг келинглар, деб жавоб бердим.

24 сентябрь куни улар маҳалламизга келиб, маҳалла котибига "келдик, муаммони ўргандик, 5 октябрдан иш бошлаймиз ва йўлни таъмирлаб берамиз", деб ёзилган қоғозларига қўл қўйдириб кетишибди. Менга эса учрашганлари ҳам йўқ.

Мана бугун 15 октябрь, йўлсозларнинг иш бошлаймиз, деган кунидан ҳам ўн кун ўтди. Аммо ҳанузгача ишни бошлашгани йўқ.

Воқеалар тафсилотидан келиб чиқсак, йўлсозлар бу йил шу йўлни таъмирламоқчи эмаслар деб тахмин қиляпмиз. Умуман олганда йўлсозларнинг бундай масъулиятсиз фаолият олиб боришларини ким назорат қилади?

Катта бир туманнинг учдан бир аҳолиси фойдаланадиган республика аҳамиятига эга бўлган йўл жаҳон андозасида бўлмаса-да, мундайроқ бўлса ҳам, қачон таъмирланади? Гап бу ерда 20-30 км. эмас, балки бор-йўғи 4-5 км. йўл ҳақида кетяпти. Наҳотки арзимаган шу йўлни таъмирлаб қўйиш шунча қийин бўлса?

Қолаверса, Тожикистон билан алоқаларимиз яхшиланиб, Ургут туманида жойлашган "Жартепа" чегара ўтиш масканининг очилиши ушбу йўлнинг аҳамиятини янада оширди. Сабаби Тожикистондан туманимизга кириб келадиган меҳмонлар асосан шу йўлдан юрадилар. Шу пайтгача ушбу йўлдан туманимизга меҳмонга келаётган тожикистонликлардан "йўлларингнинг шу қисми ўта хароб экан, наҳотки таъмирлаб қўйиш шунчалик қийин бўлса", деган гапларини бир неча бор эшитдик. Аммо туман йўлсозлари бу йўлнинг аҳамиятини инобатга олмаяптилар ва йўлнинг таъмирланишини ортга суряптилар.

Ҳурматли "Хabar.uz", илтимос, шу масалада ёрдам берсанглар.

Ҳурмат билан, Ҳиммат Аҳмедов. Самарқанд вилояти, Ургут тумани, Испанза қишлоғи, Жайратепа МФЙ."

Ушбу мурожаатни ўрганар эканмиз, унда қаламга олинган йўлнинг аҳволи ҳақиқатан ҳам хароб эканига гувоҳ бўлдик. Ургут йўлсозлари ўтган 2017 йилда ҳам, жорий 2018 йилда ҳам ушбу йўлнинг бир қисмини таъмирлашган. Аммо барибир йўлнинг аҳволи анча ёмон. Буни суратлардан ҳам билиб олиш мумкин.

Биз ушбу йўл таъмирланиши масалаласида Ургут йўлсозларидан ҳам, қолаверса, Самарқанд вилояти ва Республика йўл таъмирлаш бошқармаларидан жавоб кутиб қоламиз.

Яна бир нарсани таъкидлаб кетишни хоҳлар эдим. Биз юқоридаги мурожаат тилга олинган кўчанинг аҳволини ўрганар эканмиз, шу йўл ўтган қишлоқ аҳолисининг ҳам йўлга муносабати ўта ёмонлигини кўрдик. Аксарият жойларда тротуар йўл ёқасида яшайдиган одамлар томонидан эгаллаб олинган экан. Яна бир нечта жойда йўлнинг бузилиб, тоши чиқиб кетиши билан қизиқсак, аҳоли ўша ернинг асфальтини ўйиб, йўлнинг бу тарафидан нариги тарафига қувур ўтказган ва кейинчалик шу жойларнинг асфальти батамом ўйилиб кетган. Бу ишлар ҳақида одамларга ҳеч ким тушунтириш ишларини олиб бормаган.

Мутасаддилардан ушбу йўл масаласида жавоб кутиш билан биргаликда, бу ҳудудда яшаётган аҳолига йўллар четидаги тротуарлар ва йўлни бузиб қувур ўтказиш ишлари масаласида тушунтириш беришади, деб умид қиламиз.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг