Хоразмда кўп қаватли уй «эгаси» қарийб 10 млрд сўмлик газ ўғирлаган
Хоразм вилояти Ҳазорасп туманидаги кўп қаватли уйда 9,9 млрд сўмлик табиий газдан ноқонуний фойдаланиш ҳолати аниқланди. Бу ҳақда «Ҳудудгазтаъминот» АЖ хабар берди.
Маълум қилинишича, Ҳазорасп туманида газ таъминоти филиали комплаенс назорат тузилмалари, туман газ таъминоти бўлими ходимлари ва ҳуқуқ-тартибот органлари ҳамкорлигида ўтказилган назорат тадбирида қоида бузилиш ҳолати аниқланган.
Маълум бўлишича, тумандаги «Паҳлавон Маҳмуд» МФЙда жойлашган «H.Q.I.» МЧЖга қарашли кўп қаватли уй хатловдан ўтказилганда, таъминот ташкилоти билан шартнома тузмасдан, лойиҳа-техник ҳужжатларини сохталаштириб, «зангори ёқилғи»дан ноқонуний фойдаланиб келинаётган бўлган.
Мазкур ҳолат юзасидан далолатнома тузилиб, 9 миллиард 987 миллион сўмлик зарар қайта ҳисоб-китоб қилинган. Ҳозирда барча ҳужжатлар ҳуқуқни муҳофаза қилувчи органларга юборилган.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter