Француз олимлари COVID-19 касаллигини келтириб чиқарувчи SARS-CoV-2 коронавирусига қарши дорини муваффақиятли синовдан ўтказди. Мутахассисларнинг тадқиқотлари International Journal of Antimicrobial Agents'да нашр этиш учун юборилган.

Тадқиқотда безгакка қарши қўлланиладиган гидроксихлорохин ва азитромицин препаратлари қоришмасидан тайёрланган дори ижобий натижа келтиргани айтилган. Бу препаратларнинг самарадорлиги ҳақида бир қатор шифокорлар, хусусан хитойлик мутахассислар ҳам кўп бора айтган эди.

Марсел университетининг юқумли касалликлар шифохонасида ўтказилган тадқиқотда коронавирусга учраган одамлар иштирок этган. Улардан 16 киши назорат гуруҳида бўлган ва бу гуруҳ аъзолари касаллик аломатларига қарши даво чоралари ҳамда антибиотиклар билан даволанган. Яна 14 нафар бемор эса 10 кун давомида гидроксихлорохин қабул қилган. Улардан 6 нафарига шунингдек азитромицин ҳам берилган.

Бундай услубга кўра даволашнинг бешинчи кунига келиб гидроксихлорохин ва азитромицин қабул қилган беморлар тузалиб кетган. Уларда SARS-CoV-2 коронавируси топилмаган. Шунингдек тўққизинчи кунга келиб назорат гуруҳида бўлган бир киши тузалгани аниқланган. У етти кун азитромицин қабул қилмаган эди.

Тадқиқотчилар томонидан таъкидланишича, улар олиб борган даволаш услуби дастлабки босқич бўлиб, катта умид бера олади. Безгакка қарши дори воситаларини қабул қилган беморларда эса асорат қолмаслиги аниқланган.