Рамазон ойи давомида инсон организми одатий ҳаёт ритмидан чиқиб, мутлақо бошқа кун тартибига мослашади. Айнан шу босқичда қилинган хатолар соғлиққа жиддий таъсир қилиши мумкин. Бу даврда нафақат овқатланиш вақти, балки метаболизм, гормонал мувозанат ва ҳазм тизими фаолияти ҳам ўзгаради.

Шунинг учун рўза тугагандан кейинги давр оддий эски кун тартибига қайтиш эмас, балки организмни эҳтиёткорлик билан қайта мослаштириш босқичи ҳисобланади.

Бу босқичда тана «иқтисод режими»да ишлайди. Шу сабабли рўза тугаганидан кейин организмни бирданига оғир овқатлар билан сийлаш уни шок ҳолатига олиб келиши мумкин.

Энг кўп учрайдиган хато — бу байрамона овқатланиш. Нафси бузуқ — ҳайитда ўлар деганларидек, кўп миқдорда ширинлик, ёғли таомлар ва тартибсиз овқатланиш қисқа вақт ичида қуйидаги муаммоларга сабаб бўлади: вазннинг тез ошиши, ошқозон оғриқлари, ҳолсизлик ва ҳатто қон босимининг ўзгариши.

Организмни тўғри тиклаш учун энг аввало овқатланишни аста-секин йўлга қўйиш керак. Бирданига кўп емаслик, балки кам-камдан, лекин тез-тез овқатланиш тавсия этилади. Оқсил ва сабзавотларга бой таомлар ошқозонни енгил ишга туширади ва ортиқча юкламанинг олдини олади.

Сув истеъмоли ҳам жуда муҳим. Рўза пайтида организм маълум даражада суюқлик танқислигига учрайди. Шунинг учун кун давомида етарлича сув ичиш метаболизмни тиклайди, организмни тозалайди ва умумий ҳолатни яхшилайди.

Яна бир муҳим жиҳат бу ичаклар фаолияти. Сўнгги илмий изланишларга кўра, ичаклар инсон саломатлигининг асосий омилларидан бири ҳисобланади. Ичаклар — иккинчи мия, деб ҳам бежиз айтилмаган. Рўзадан кейин қатиқ, кефир ва толага бой маҳсулотлар истеъмоли ичак микрофлорасини тиклашга ёрдам беради.

Шу билан бирга, уйқу ва дам олиш режимига ҳам эътибор қаратиш лозим. Табиийки, Рамазон ойи давомида кўпчиликда уйқу тартиби бузилган, бу эса стресс гормонларининг ошишига олиб келади. Рўзадан кейин уйқуни меъёрга келтириш организмнинг тезроқ тикланишига хизмат қилади.

Жисмоний фаолликни ҳам унутмаслик керак. Бирданига оғир машқлар эмас, балки оддий юриш ёки енгил ҳаракатлар орқали танани аста-секин фаол ҳолатга қайтариш мақсадга мувофиқ.

Хулоса қилиб айтганда, рўза — бу фақатгина оч қолиш эмас, балки организмни янгилаш жараёни. Аммо бу янгиланишни сақлаб қолиш учун рўзадан тўғри чиқиш ҳам жуда муҳим.