Хабарлар тезкор Телеграм каналимизда Обуна бўлиш ×

Азиза Ниёзметовага шифокорлар олти ой умри қолганини айтишганди

Азиза Ниёзметовага шифокорлар олти ой умри қолганини айтишганди

«Юрагимдан жой бераман, келсангиз». Сўнгги концертдан фотолавҳа.

Азиза Ниёзметованинг вафот этгани ҳақидаги хабарни ўқиб, кўнглим алланечук бўлиб кетди. Ўлим ҳақлигини билсам-да, унга ичим ачиди...

Хонанда билан 2015 йилда танишдим. Тўғрироғи, унинг сўнгги концерт дастурини ўтказган ташкилотчи аёл қўярда-қўймай, ҳамкорлик қилишга таклиф этди. Рости, ўшанда роса иккилангандим. Биринчидан, қўлимда ҳали ёшига тўлмаган чақалоғим бўлса, иккинчидан хонанданинг инжиқлиги ва сўкағонлиги ҳақидаги гап-сўзлар қулоғимга чалинганди.

Илк учрашувнинг ўзидаёқ Азиза Ниёзметовага нисбатан фикрим ўзгарди. У дангалчи, шаддод ва эркакшода бўлса-да, ўз ҳурматини биладиган аёл эди. Мардга мард бўларди, номардга эса ҳаққини бериб қўймасди.

Концертга тайёргарлик кўриш жараёнида у билан кўп суҳбатда бўлдим. Шунда ўзим учун кибрли ва такаббур кўринадиган Азиза Ниёзметованинг асл қиёфасини кашф этгандек бўлдим.

— Оилада тўрт қизнинг тўнғичиман. Ҳар бир оилада бўлганидек, биз ҳам осонликча катта бўлиб қолмаганмиз. Мен ота-онам учун ҳам ўғил, ҳам қиз эдим. Сингилларимни оёқа қуйгунча, ота-онамга ёрдамчи бўлдим. Ҳожи онам бировни сўкиб, бақираётганимни эшитиб қолса: «Бунча тилинг аччиқ, болалигингда ишонувчан, соддагина қиз эдинг, нима жин урди сени», деб ранжиб қолади. Нима қилай, ҳаётнинг бир-икки муштидан кейин шунақа бўлиб қолдим, деб куламан, — деганди.

Азиза Ниёзметованинг кўринишига қараб, серфарзанд она эканлигига ишониш қийин эди. Аммо у баъзи хонандаларга ўхшаб она бўлишдан қўрқмасди. Яратган унга тўрт фарзандни ато этган бўлса-да, хонанда икки етимнинг ҳам бошини силади.

— Узоқ қариндошларимиздан бири қийналиб қолганди. Унга ёрдам бериш учун Достон исмли ўғлини қарамоғимга олдим. Онаси бошқа бўлса-да, у менинг қонуний ўғлим. Яхши йигит, секин-аста ўз йўриғимга солиб, ташкилотчиликни ўргатаяпман. Амира қизимни эса чақалоқлик пайтида асраб олганман. Онаси меҳрибонлик уйига топшириш ниятида эканлигини эшитиб, ундан қизини менга беришини илтимос қилдим. Тавба қилдим-у, ўзим туққан фарзандларимнинг санъатга қизиқиши йўқ-у, Амиранинг овозида шира бор. Шу қизим касбимни давом эттирса керак, — деганди.

Бундан ташқари хонанданинг Нилуфар Назарий, Миразиз Назарий, Диёра ва Мадина исмли фарзандлари ҳам бор. У Мадинани 44 ёшида дунёга келтирган эди.

— Шифокорлар бачадонимда ўсимта борлигини аниқлашди. Машҳур шифокорлардан бири ёш экансиз, фарзанд кўрсангиз хасталик йўқолиши мумкин, деди. Шу боис, олтинчи фарзандимни дунёга келтиришга ният қилдим. Яратган менга Мадинахонни туҳфа этди, — деб ўшанда 5-6 ойлик бўлиб қолган қизининг расмларини кўрсатганди.

Азиза Ниёзметованинг касаллиги билан боғлиқ хабарни эшитганимга бир йилдан ошди. Чунки ўтган вақт мобайнида у ижодга беэътибор бўлиб қолганди. Ҳатто, уни дугоналари атрофида учратиш ҳам амримаҳол бўлиб қолганди.

Бу аёл хонандаликдан ташқари, тадбиркорлик билан ҳам шуғулланарди. Пулдан муаммоси йўқлиги боис, яқинлари ҳамроҳлигида Ҳиндистонда ҳам даволанди. Аммо, шифокорлар унинг соғайиб кетишига умид қилишмади. Бор-йўғи олти ой умри қолганлигини яқинларига очиқчасига айтишди.

Қисқа вақт ичида ичак саратонига чалинган Азиза Ниёзметовани касаллик бутунлай маҳв этгани ҳақида шогирдлари куюниб гапиришди. Бир неча бор кома ҳолатига тушиб қолгани, қабул қилмаган дори-дармони қолмагани... Хуллас, банданинг минг югургани, Яратганнинг бир айтгани бўлди. Азиза Ниёзметова 14 октябрь куни оғир аҳволда шошилинч шифохонга олиб келиниб, комага тушди-ю, қайтиб кўзини очмади.

Афсус, ота-онасига ва фарзандларига бу мусибатни кўтариш осон кечмайди. Хонанданинг дафн маросими бугун, 16 октябрь куни пешин намозидан кейин ота юрти Хоразмда бўлиб ўтди.

Аллоҳ барчамизнинг гуноҳларимизни маҳфират айласин, ўтганларнинг руҳлари обод бўлсин!

Наргиза Муродова

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг