Қорақалпоғистон Республикаси Тахиатош туманида яшовчи фуқаро Т.Н., туман ИИБга мурожаат қилиб, фирибгарлик йўли билан унинг банк картасидан пуллар ўғирлангани ҳақида ариза қолдирган.

Аниқланишича, телеграм мессенжеридаги «Нукус OLX базар» номли гуруҳда ўзини «Дилшодбек» деб таништирган фойдаланувчи фуқарога онлайн кредит расмийлаштириб беришини айтиб, ишончига кирган ва ҳақиқатда унинг номига мобил илова орқали 9 млн 500 минг сўм миқдорида кредит расмийлаштирган. Бироқ ушбу пуллар бироз вақтдан сўнг номаълум тарзда ечиб олинган.

Фуқаро ҳудудий ИИБга мурожаат қилиб, фирибгарлик қилган номаълум шахсга нисбатан қонуний чора кўришликни сўраган.

Тезкор-қидирув тадбирлари натижасида, ушбу хатти-ҳаракатларни содир этган шахс Қорақалпоғистон Республикаси Чимбой туманида яшовчи «1хbet», «Linebet» ва «Mostbet» каби таъқиқланган онлайн таваккалчикка асосланган ўйинлар ҳисоб рақамларини тўлдириш билан шуғулланувчи, олий ўқув юрти 1 босқич талабаси, 1998 йилда туғилган Ж.Т. экани аниқланган.

Айни пайтда Ж.Т.га нисбатан Жиноят кодексининг 168-моддаси билан жиноят иши қўзғатилиб, тергов ҳаракатлари олиб борилмоқда.