Бугун, 14 февралга ўтар кечаси АҚШ миллий футбол лигаси финали — чемпион аниқланади. АҚШдаги энг йирик спорт воқеаси-финалда «Лос-Анжелес Рэмс» ва «Цинциннати Бенгалс» тўқнашади.

Бироқ гап Супербоул ҳақида кетганида спорт иккинчи даражали масалага айланади. Анъанага кўра, йирик компаниялар ушбу тадбирга пулларини аямай сочади. Асосий кураш майдон атрофида кечади.

Масалан, бу финал пайтидаги ярим дақиқалик реклама 6,5 млн. доллар туради. Албатта, 100 миллионлик аудитория назарда тутилса, реклама харжлари чиқиб кетади.

Компаниялар томошабинларнинг эътиборини ва «ҳамёни»ни қўлга киритиш учун кино ва шоу-бизнес юлдузларини ўз реклама роликларига таклиф этади. Супербоул арафасида интернетда бундай роликлардан бир нечтаси айланишга улгурди.

Масалан, «General Motors» автомобил компанияси ролигида Ёвуз доктор ролини Майк Майерс жонлантирди.

«Amazon» эса ақлли колонкалари фикрни ҳам ўқишига Скарлетт Йоҳанссон ёрдамида одамларни ишонтиришга ҳаракат қилди.

«Verizon Communications» Жим Керрини таклиф қилди, у 1996 йилги «Кабелчи» фильмидаги ролини яна бир бор ўйнади.

Японларнинг «Rakuten» электрон тижорат компанияси ҳам четда қолмади, бевосита Супербоул пайти намойиш этиладиган ролигининг тизерини тақдим этди. Унда «Тахтлар ўйини» сериалида Септа Юнеллани ўйнаган Ҳанна Уэддингем суратга тушди.

Эфир вақтини сотиб олган компаниялар орасида электр кроссовер ишлаб чиқарувчилар, IT-гигантлар, чипс ва фастфудчилар, криптовалюталар сотувчилари учун платформалар ва ҳоказолар бор.