Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

«Умрбод четлатилган» Бабаян 15 кундаёқ оқланган экан. ЎФА буни бир йил ўтиб эълон қилди

«Умрбод четлатилган» Бабаян 15 кундаёқ оқланган экан. ЎФА буни бир йил ўтиб эълон қилди

Фото: «Sports.ru»

Қизиғи, Самвел Бабаян бундан бир йил аввал «Бунёдкор» клуби (!) кафиллиги остида афв этилган экан.

Ўзбекистонлик мутахассис Самвел Бабаяннинг Тошкентнинг «Локомотив» футбол клубида иш бошлаши юзасидан Ўзбекистон футбол ассоциацияси расмий муносабат билдирди:

Самвел Бабаян Ўзбекистон миллий терма жамоаси ЖЧ-2018 йўлланмасини қўлга кирита олмаганидан сўнг истеъфога чиқарилганди. Кейинроқ ташкилот Самвел Бабаяннинг бош жамоадаги фаолиятини алоҳида ўрганиб чиқиш талаб этилган ўн мингдан зиёд мактубни Ўзбекистон Республикаси Президентининг портали орқали қабул қилиб олди. Айнан мана шу сўровларга асосан 2018 йилнинг 15 январь куни Самвел Бабаянга нисбатан Ўзбекистон футбол ассоциацияси иш очди ҳамда мазкур иш якунига қадар ЎФА Ижроқўми мураббийни футболдан четлатди.

Ўрганишлар Самвел Бабаян миллий терма жамоадан ўз манфаатлари йўлида фойдаланганди, деган хулосага олиб келди. Шунинг ўзиёқ унинг учун терма жамоалар эшикларини ёпиш учун етарли бўлди. Бироқ кейинчалик ЎФА Ижроқўмига  «Бунёдкор» футбол клуби номидан билдирги тақдим этилиб, Бабаяндан дисквалификацияни олиб ташлаш сўралган.

«Бунёдкор» футбол клуби С.Бабаянга шахсий кафил бўлиш ташаббусини билдиради ва унга қўлланилган интизомий чорани енгиллаштиришни сўрайди. Зеро, сўнгги вақтларда давлат раҳбарининг шахсан ўзи билиб-билмай айбли қилмиш қилган ва ўз айбидан чуқур пушаймон бўлган шахсларни афв этмоқда. Ўз навбатида, айбини тан олган ва уни ювиш учун меҳнат қилишга тайёр турган шахсларга нисбатан инсонпарварлик принципини қўллаган ҳолда ёрдам қўлини чўзиш зарур деб ҳисоблаймиз», — дейилади  ёзилган билдиргида.

ЎФА Ижроқўми аъзолари мазкур хатни бир овоздан ёқлади. Шу тариқа Ўзбекистон футбол ассоциацияси томонидан очилган иш 2018 йилнинг 1 февраль куни ёпилди ҳамда Самвел Бабаяннинг дисквалификацияси бекор қилинди.   

Самвел Бабаян термада фаолият олиб борган даврда йўл қўйилган камчиликлар, унинг термага бош мураббий этиб тайинланиши борасидаги қарорнинг узвий давомидир. Бу ҳолат Ўзбекистон футбол ассоциациясига хулоса ўрнида хизмат қилиб, миллий терма жамоа бош мураббийи жавоб бериши керак бўлган аниқ талаблар ишлаб чиқилиши вазифа сифатида ЎФА Терма жамоалар бўлимига топширилди. Унга кўра, миллий терма жамоани кейинги ўринларда Европа ва Лотин Америкаси футболи билан яхши таниш бўлган, улардаги устун жиҳатларни ўзбекистонлик футболчиларга ўргата олиш салоҳиятига эга бўлган, шунингдек, фаолияти давомида кўзга кўринарли ютуқларни қўлга киритган мутахассис бошқариши керак эди. ЎФА шундан келиб чиққан ҳолда миллий терма жамоага таниқлик аргентиналик мутахассис Эктор Куперни олиб келди.

ЎФА бундан буён Самвел Бабаян Ўзбекистоннинг ҳеч қайси терма жамоасида фаолият юритишига йўл қўймайди. Қўшимчасига, кейинги фаолиятини Самвел Бабаянсиз тасаввур қила олмаган «Локомотив» футбол клубининг қарорига ҳам қаршилик кўрсатмайди, дейилади ЎФА хабарида.

Куни кеча футбол мутахассиси Самвел Бабаяннинг «Локомотив»  клуби президенти маслаҳатчиси этиб тайинлангани хабар берилган эди. Бу хабар футбол мухлислари орасида турли мунозараларни келтириб чиқарди.

Чунки, Ўзбекистон МТЖ ЖЧ-2018 йўлланмасидан қуруқ қолгач, Бабаян истеъфога чиқарилган эди. Кейинроқ, у ЎФФ (ҳозирда ЎФА-таҳр) Ижроия Қўмитаси Бюросининг 2018 йил 15 январдаги 3-сонли қарорига мувофиқ футболга алоқадор ҳар қандай фаолият билан шуғулланишдан умрбод (!) четлаштирилганди.

Ҳатто унинг ҳужжатлари прокуратурага топширилгани айтилганди. Бироқ, вақт ўтмай Бабаян Латвия чемпионатида пайдо бўлганди.

Энди маълум бўлишича, умрбод (!) четлатилган Бабаян 15 кун ичида оқланган бўлиб чиқмоқда. ЎФА эса буни бир йил ўтиб ошкор қилмоқда.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг