Aksariyat odamlar «dori ichsam, tezroq tuzalaman» deb o‘ylaydi. Ammo bir vaqtning o‘zida juda ko‘p dori ichish (tibbiyotda buni polifarmatsiya deyishadi) —  foydadan ko‘ra ko‘proq zarar keltiradi.

Dorilar bir-biriga ta’sir qilib, organizmda kutilmagan nojo‘ya ta’sirlarni chaqirishi mumkin. Ayniqsa, yosh o‘tgan sayin bu xavf ortadi: 70 yoshdan oshgan har o‘n kishidan biri 10 va undan ortiq dori ichadi.

Ko‘pincha odamlar shunday tuzoqqa tushib qolishadi:

• Birinchi dorining nojo‘ya ta’siri paydo bo‘ladi (masalan, me’da og‘rishi);
• Shifokor esa buni yangi kasallik deb o‘ylab, unga qarshi yana bir dori yozadi;
• Bu yangi dori esa boshqa muammolarni boshlaydi, natijada dorilar soni ko‘payib ketadi;
• Insonda ong xiralashuvi, xotira susayishi, qon bosimining beqarorligi va eng xavflisi — yiqilib jarohat olish xavfi oshadi.

Shifokorlar odatda dori yozishni o‘rgatishadi, lekin keraksiz dorini qanday to‘xtatishni kamdan-kam o‘rgatishadi. Bemorlar ham hayot tarzini o‘zgartirishdan ko‘ra, tezroq «tabletka ichib qutulish»ni afzal ko‘rishadi. Farmatsevtika kompaniyalari har bir simptom uchun yangi dori sotishdan manfaatdor.

Shifokorlar ko‘pincha dorini kamaytirish haqida o‘zlari gap ochishmaydi, shuning uchun tashabbusni o‘z qo‘lingizga oling:

• Qaysi dorini, qancha dozada va nima uchun ichayotganingizni qog‘ozga yozib yuring;
• «Bu dori menga chindan ham kerakmi?», «Qachon to‘xtata olaman?», «Boshqa dorilarim bilan birga ichsam zarari yo‘qmi?» deb shifokordan ochiqchasiga so‘rang;
• Har safar yangi dori yozilganda, uning foydasi va zarari haqida to‘liq ma’lumot oling;
• Imkon qadar davolashni eng oz miqdordagi dori bilan boshlashga harakat qiling, shunda nima yordam berayotganini tushunish oson bo‘ladi.
•