Gonkongning Tai Po tumanidagi Van Fuk turar-joy majmuasida sodir bo‘lgan yong‘in oqibatida jami 146 kishi, jumladan, bitta o‘t o‘chiruvchi halok bo‘ldi.

South China Morning Post gazetasining hukumat ma’lumotlariga tayanib xabar berishicha, yetmish to‘qqiz kishi jarohatlangan, yana 150 kishi bedarak yo‘qolgan. 

Taxminan 4800 kishi istiqomat qiladigan majmuadagi yong‘in 26-noyabr kuni boshlangan. U 28-noyabrgacha to‘liq o‘chirilmagan. O‘sha paytda 128 kishi halok bo‘lgan va 200 kishi bedarak yo‘qolgan deb xabar berilgan. 

Turar-joy majmuasidagi sakkizta bino 2024-yil iyul oyidan beri ta’mirlanmoqda. Dastlabki ma’lumotlarga ko‘ra, yong‘in ta’mirlash ishlari paytida ishlatilgan polistirol ko‘pik tufayli yuzaga kelgan, bu esa yong‘inning binolar ichida tez tarqalishiga olib kelgan. Fasadlar bo‘ylab o‘rnatilgan bambuk iskala ishlatilishi ham muhokama qilindi.

Huquqni muhofaza qilish organlari xodimlari odam o‘ldirishda gumon qilinib, uch kishini hibsga olishdi: ikkita direktor va uylarni ta’mirlash uchun mas’ul pudratchi maslahatchisi.