AQSh prezidenti Donald Trampning fikricha, Fransiyaning Falastin davlatchiligini tan olishi Yaqin Sharqda hech narsani o‘zgartirmaydi.

Amerika yetakchisining aytishicha, Fransiya prezidenti Emmanuel Makronning sentyabr oyida BMT Bosh Assambleyasida Falastinni tan olish niyati haqidagi bayonoti “muhim narsa emas”. 

“Uning aytganlari muhim emas”, dedi Donald Tramp jurnalistlarga Fransiya prezidentining bayonotini izohlar ekan (Reuters iqtibos keltirgan). "Bu hech narsani o‘zgartirmaydi", deb qo‘shimcha qildi u. 

"Makron juda yaxshi yigit", dedi Amerika rahbari. "Menga yoqadi, lekin bu bayonot hech qanday yuk bosmaydi". 

HAMAS vakillari Makronning bayonotlarini “Falastin xalqi uchun adolatga erishish yo‘lidagi ijobiy qadam” deb atadi. AQSh va Isroil Fransiya rahbarining bayonotlarini qoraladi. 

Payshanba kuni Fransiya prezidenti Emmanuel Makron sentyabr oyida BMT Bosh Assambleyasida Parij Falastinni tan olishini aytdi. Bu qaror Isroil va AQSh rasmiylari tomonidan tanqid qilindi.

Britaniya Bosh vaziri Kir Starmer o‘sha kuni "davlatchilik Falastin xalqining ajralmas huquqi" ekanligini va o‘t ochishni to‘xtatish Britaniyani "tan olish yo‘liga" boshlashini aytdi. Shu bilan birga, janob Starmer London o‘z pozitsiyasini rasmiylashtirishga tayyormi yoki yo‘qligini aniq aytmadi. 2024-yildan beri Falastinni Irlandiya, Norvegiya, Ispaniya va Armaniston kabi o‘nta davlat rasman tan olgan. Falastin mustaqilligi xalqaro maydonda 147 davlat, jumladan, O‘zbekiston, Rossiya va Xitoy tomonidan tan olingan.