АҚШ расмийлари ҳинд миллиардери Гаутам Адани ва унинг компанияси Adani Group`га қарши порахўрлик, фирибгарлик ва санкцияларни бузиш айбловлари бўйича терговни якунламоқда, деб хабар беради CNBC.

2026 йил 18 май куни АҚШ Ғазначилик департаменти унинг асосий компанияси Adani Enterprices`га қарши ишни кўриб чиқди. АҚШ регулятори компаниянинг Дубайда жойлашган савдогардан суюлтирилган нефт ва газини сотиб олганини, таъминот Эрондан келиб чиққанлиги ҳақидаги кўрсатмаларни эътиборсиз қолдирганини таъкидлади ва қонунбузарликларни жиддий деб атади. Бундан ташқари, АҚШ Адлия вазирлиги ўтган ҳафта Қимматли қоғозлар ва биржалар комиссияси бизнесменга қарши фуқаролик даъвосини ҳал қилганидан сўнг, жиноий фирибгарлик айбловларини бекор қилишга қарор қилди.

2024 йил ноябр ойида Ню-Йорк федерал суди Аданини ва яна етти кишини қуёш энергияси шартномаларини таъминлаш учун ҳинд расмийларига 250 миллион доллардан ортиқ пора берганликда айблади. Судланувчилар америкалик ва халқаро инвесторларни 3 миллиард доллардан ортиқ маблағ йиғишда чалғитганликда айбланмоқда. АҚШ суд айбловларининг бекор қилиниши, ўтган йилнинг сентябр ойидаги ҳолатига кўра, соф қарзи тахминан 32 миллиард долларни ташкил этган Adani Group компаниясига инфратузилмани кенгайтириш режаларини амалга ошириш учун халқаро капитал бозорларига қайтишга ёрдам бериши мумкин.

Қимматли қоғозлар ва биржалар бўйича комиссия (CEC) Қўшма Штатлардаги асосий молиявий бозор регулятори бўлиб, қимматли қоғозлар тўғрисидаги қонунларни амалга оширади ва инвесторларнинг ҳуқуқларини ҳимоя қилади. Агентлик оммавий компаниялар, биржалар ва брокерларнинг фаолиятини назорат қилади ва фирибгарлик ёки бозорни манипуляция қилиш учун фуқаролик даъволарини қўзғатиш ваколатига эга.

2023 йилда миллиардер Hindenburg Research инвестиция-тадқиқотлар компанияси Adani Group конгломератини кўп сонли молиявий бузғунчиликларда айблаганидан сўнг уч кунда 72 млрд доллар йўқотганди. 

Капитал бозори - бу компаниялар ва ҳукуматлар актсиялар ва облигацияларни чиқариш ва сотиш орқали узоқ муддатли инвестицияларни жалб қиладиган молиявий сектор. Халқаро капитал бозорларига кириш йирик бизнесга хорижий банклардан катта миқдордаги кредитлар ва йирик лойиҳаларни ривожлантириш учун маблағлар олиш имконини беради.