АҚШ ва Эрон ўртасида урушни тўхтатиш бўйича янги режа ишлаб чиқилди. Reuters агентлиги манбаларига таяниб, ушбу келишувнинг бугун – душанба кунидан кучга кириши ва у Ҳўрмуз бўғозини қайта очишни назарда тутиши ҳақида ёзмоқда.

Маълум қилинишича, режа Покистон томонидан тайёрланган бўлиб, у икки босқичли ёндашувни ўз ичига олади: аввал зудлик билан ўт очишни тўхтатиш, кейин эса кенг қамровли тинчлик келишувини имзолаш.

Манбага кўра, дастлабки келишув электрон тарзда меморандум сифатида расмийлаштирилиши ва музокаралар асосан Покистон орқали олиб борилиши кутилмоқда.

Музокараларда Покистон армияси раҳбари Осим Мунир АҚШ вице-президенти Жей Ди Вэнс, махсус вакил Стив Уиткофф ҳамда Эрон ташқи ишлар вазири Аббос Ароқчи билан узлуксиз алоқада бўлган.

Режага мувофиқ, ўт очишни тўхтатиш дарҳол кучга кириши, Ҳўрмуз бўғози очилиши ва 15–20 кун ичида якуний келишув ишлаб чиқилиши кўзда тутилган. Келишув шартли равишда «Исломобод келишуви» деб номланмоқда.

Шу билан бирга, якуний битимда Эроннинг ядровий қурол яратмаслик мажбурияти, эвазига санкцияларни юмшатиш ва музлатилган активларни қайтариш масалалари ҳам бўлиши кутилмоқда.

Ҳозирча Теҳрон ушбу таклифга расмий жавоб бермаган. Манбаларга кўра, Эрон ҳалигача вақтинчалик сулҳ бўйича ҳам аниқ позиция билдирмаган.

Сўнгги дипломатик фаоллик Ҳўрмуз бўғози орқали нефть ташишга таҳдид кучайган бир пайтда кузатилмоқда. Бу эса жаҳон энергия бозорида беқарорликни янада оширмоқда.

Аввалроқ, АҚШ президенти Дональд Трамп можарони тез орада якунлаш зарурлигини таъкидлаб, акс ҳолда кескин чоралар бўлишидан огоҳлантирган эди.