Денвер аэропортида самолёт учиш йўлагидаги одамни уриб кетди
АҚШнинг Денвер халқаро аэропортида Airbus A321 самолёти учиш йўлагида бўлган одамни уриб кетди. Ҳодиса Frontier Airlines авиакомпаниясининг Лос-Анжелесга йўл олган рейси учишга тайёрланаётган пайтда содир бўлган.
Маълумотларга кўра, самолёт учиш йўлагига ҳаракатланаётган вақтда номаълум шахс кутилмаганда майдонга чиқиб қолган. Нега у ерда бўлгани ҳозирча аниқ эмас.
Диспетчерлар билан музокара ёзувида учувчи: «Биз тўхтаяпмиз. Ҳозиргина кимнидир уриб юбордик», – деган. Шундан сўнг двигателда ёнғин чиққани ҳам хабар қилинган.
Ҳодисадан кейин аэропортдаги яқин самолётлар ҳаракати тўхтатилган, ёнғин-қутқарув хизматлари воқеа жойига юборилган. Йўловчилар эса автобуслар орқали терминалга эвакуация қилинган.
Айни пайтда Frontier Airlines ва полиция ҳодиса бўйича расмий баёнот бермаган. Терговни АҚШ Миллий транспорт хавфсизлиги кенгаши олиб бормоқда.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter