Халқаро аэропортлар кенгаши (ACI) дунёдаги энг гавжум аэропортлар рейтингини тузди.

ACI маълумотларига кўра, 2025 йилда жами авиайўловчилар сони 9,8 миллиард кишини ташкил этди (сайёрамизнинг жами аҳолисидан кўп). Бу кўрсаткич 2024 йилга нисбатан 3,6 фоизга, пандемиядан олдинги 2019 йилга нисбатан эса 7,3 фоизга кўпдир.

Дунёдаги энг гавжум аэропорт, ўтган йилдагидек, Атлантадаги Ҳартсфилд-Жексон аэропорти (АҚШ) бўлди — ундан 106,3 миллион йўловчи фойдаланган. Ушбу аэропорт рейтинг етакчилигини 27 марта қўлга киритган, фақат 2020 йилда (Covid-19 сабабли парвозлар камайганда) биринчиликни бой берган эди.

Рейтингнинг иккинчи поғонасини кетма-кет учинчи йил Дубай аэропорти эгаллаб турибди (92,2 миллион йўловчи). Кучли учликни Токиодаги Ханеда аэропорти 91,7 миллион йўловчи билан якунлаб берган.

Шунингдек, топ-10 таликдан Даллас-Форт-Уэрт, Шанхайдаги Пудун, Чикаго, Лондондаги Ҳитроу, Истанбул, Гуанчжоу Байюн ва Денвер аэропортлари жой олди. ACI қайд этишича, дунёдаги жами йўловчи оқимининг қарийб 9 фоизи айнан мана шу энг гавжум авиакўрфазларга тўғри келади.