Туркманистон президентлигига даъвогарларни рўйхатга олиш кампанияси якунланди. Умумий ҳисобда марказий сайлов комиссияси 9 нафар номзодни рўйхатга олди. Бу ҳақда Тurkmenportal маълум қилди.

Улардан 3 нафари сиёсий партиялар, 6 нафари эса фуқароларнинг ташаббускор гуруҳи томонидан кўрсатилган.

Улар орасида: Демократик партиядан Бош вазир ўринбосари Сердар Бердимуҳамедов, Аграр партиядан Марий вилояти маъмурияти раҳбари ўринбосари Агаджан Бекмуродов, Саноатчилар ва тадбиркорлар партиясидан «Вепали Гурлушик» иқтисодий жамияти директори Бабамурат Мередов.

Ташаббускор гуруҳлардан: молия-иқтисодиёт ўрта касб-ҳунар билим юрти директори Перхат Бегенджов, «Аваза» санаторийси бош шифокори Бердимаммет Гурбанов, санитария бўлими бошлиғи Максатимират Овезгелдиев, Туркманистон давлат энергетика институтининг «Қайта тикланувчи энергия манбалари» илмий-ишлаб чиқариш маркази директори Какагелди Сариев, Дашогуз вилоятидан партия қўмитаси раиси Максат Одешов, Туркман давлат жисмоний тарбия ва спорт институти илмий-тадқиқот ишлари бўйича проректори Хидир Нуннаев.

Жорий йилнинг 12 март куни бўлиб ўтадиган Туркманистон президенти сайлови бўйича сайлов кампанияси давом этмоқда.