Беларус раҳбари Александр Лукашенко унинг мамлакати Украинага таҳдид туғдирмаслигини айтди. Лукашенко Украинага қарши олдин берган баёнотлари юзасидан узрхоҳлик қилар экан, Беларус шаънига айтилган таҳдидларга жавобан шундай йўл тутганини маълум қилди.

«Агар (Украина президенти) Владимир Александровичнинг (Зеленский) кўнгли оғриган бўлса, ўша сўзлар учун кечирим сўрайман. У уруш ҳолатида эканини инобатга олсак, бу гапларни айтмаганим маъқул эди. Эҳтимол, ушбу мавзуда бу қадар кескин фикр билдириш керак эмас эди. Лекин бошқа томондан, у ҳам тушуниши керакки, одам нима экса, шуни ўради», — деган Беларус раҳбари.   

Лукашенко Зеленскийни “ёш ва тажрибасиз” деб сифатлар экан, Беларус ҳақида сўз борганда тилига эҳтиёт бўлишни ҳам эслатган.  

Украина ҳукумати Беларусни Россиянинг босқинчилик урушига кўмак беришда айблаб келади. Жумладан, жорий йил феврал ойида Зеленский “украиналикларни ўлдиришга кўмак бергани” сабаб Лукашенкога қарши санкция жорий этди.

Зеленскийнинг фикрича, Лукашенко шахсий ҳокимиятини мустаҳкамлаш учун Беларус суверенитетини сотмоқда ва Россияга санкцияларни айланиб ўтишда ёрдам бермоқда.

Украина томонига кўра, Беларусдаги 3000 дан зиёд корхона Россияга ракета ишлаб чиқариш учун эҳтиёт қисмларни етказиб бермоқда. Беларус, шунингдек, ўз ҳудудида “Орешник” баллистик ракеталарини жойлаштирган. 2025 йилдан Беларус корхоналари Россияни ушбу қурол учун зарурий компонентлар билан таъминламоқда.  

Май ойида Зеленский Россия–Беларус ядровий машғулотлари ўтказилиши фонида Украина шимолига нисбатан юзага келиши мумкин бўлган ҳарбий таҳдидлар сабабли Киев Москва ва Минск раҳбариятига қарши превентив чоралар кўришга тайёрлигини маълум қилган эди.

Апрел ойида эса Зеленский Беларус Украина чегараси йўналишида йўллар қураётгани ва Украина яқинида артиллерия жойлаштираётганини айтган эди.

Украина Учувчисиз тизимлар кучлари қўмондони Роберт Бровди ҳам ҳарбийлар Беларус ҳудудидаги 500 та эҳтимолий нишонни аниқлаб бўлганини маълум қилган ва Лукашенкони Минскнинг Россия томонидан урушга тортилиши оқибатидан огоҳлантирган эди.

Лукашенко бунга жавобан агар Беларус хавфсизлигига таҳдид туғилса, Украина ҳудудидаги “жуда жиддий нишон”га зарба бериш билан таҳдид қилган эди.

Дарвоқе, Беларус мухолифати етакчиси Светлана Тихановская Лукашенконинг Зеленскийдан кечирим сўрашига муносабат билдираркан, ҳеч қандай узр-маъзур босқинчилик урушида иштирок этиш айбини юволмаслигини айтган. Тихановская, шунингдек, Лукашенко Украинани кўпдан буён Россияга таслим бўлишга ундаб келганини ҳам эслатган.

Дарҳақиқат, Александр Лукашенко бир неча йилдан буён Украинани ҳарбий ҳаракатларни тўхтатишга чорлаб келади.