Туркиянинг кўп асрлик цивилизациялари жойлашган Анадолу минтақаси бугун ҳам ўзининг диний анъаналари ва бой маданий мероси билан сайёҳларни ўзига жалб этади. Шу мероснинг энг ёрқин намунасидан бири — Жалолиддин Румийнинг вуслат кечаси сифатида нишонланадиган Шаб-и арус маросими бўлиб, ҳар йили 7–17 декабр кунлари Коня шаҳрида ўтказилади. ЮНЕСКОнинг Номоддий маданий мероси рўйхатига киритилган Мавлавий Само рақслари ушбу тадбирнинг асосий қисми ҳисобланади.

Шаб-и арус Румийнинг вуслат — яъни Яратган билан учрашув кечаси сифатида васият қилган сўнгги онидан келиб чиққан. Шунинг учун бу кунлар қайғу билан эмас, балки маънавий зиё ва руҳий байрам сифатида нишонланади. Тадбир давомида Коня шаҳри маърузалар, шеър кечалари, само рақслари, кўргазмалар ва театр саҳналари орқали ҳақиқий маданий марказга айланади.

1207 йилда Балхда туғилган Румийнинг ҳаёти Табризлик Шамс билан учрашувидан сўнг янги маънавий босқичга кўтарилган. Унинг муҳаббат ва камолот ҳақидаги таълимоти, “Қандай бўлсанг-да, яна кел!” деган даъвати дунёнинг турли бурчакларида инсониятга илҳом бериб келмоқда. Конядаги Мавлоно музейи, Каратай мадрасаси, Чаталҳўюк неолит ёдгорлиги ва тарихий Силле қишлоғи эса Румий меросини янада яқиндан ҳис қилиш имконини тақдим этади.