Хитой компаниялари жаҳон автомобил бозоридаги мавқеини мустаҳкамлашда давом этмоқда. 2026 йилнинг биринчи ярим йиллиги якунларига кўра, мамлакатнинг учта компанияси дунёдаги автомобил ишлаб чиқарувчилар етакчи ўнталигига кирди. Бу ҳақда Carnewschina хабар берди.

BYD, Geely ва Chery кучли ўнликда

Энг яхши натижани BYD қайд этиб, жаҳон бозоридаги 4,8 фоиз улуш билан олтинчи ўринни эгаллади. Таққослаш учун: ўн йил аввал компаниянинг бозор улуши атиги 0,6 фоизни ташкил этган. Бироқ шуни ҳам таъкидлаш ўринлики, кўрсаткич 2025 йилга нисбатан бироз пасайган — ўшанда жаҳон бозорида сотилган автомобилларнинг 5,4 фоизи BYDга тўғри келганди.

Еттинчи ўринни Geely Holding Group 4,6 фоизлик натижа билан эгаллади. Холдинг статистикасига нафақат Geely, балки унинг иштирокидаги Volvo, Smart, Polestar, Lotus, Proton ва бошқа брендлар савдоси ҳам киритилган.

Тўққизинчи ўриндан Chery жой олди. Компаниянинг жаҳон бозоридаги улуши 4,1 фоизни ташкил қилди. Бу Ford кўрсаткичи билан тенг. 2016 йилда Cheryнинг улуши атиги 0,8 фоиз эди.

Хитойнинг яна бир компанияси — SAIC кучли ўнликка етишига озгина қолди. Компания 3,7 фоизлик улуш билан 11-ўринни эгаллади. Шунингдек, рейтингда Changan (17-ўрин, 1,9 фоиз), GWM (18-ўрин, 1,8 фоиз), BAIC (21-ўрин, 1,2 фоиз) ва Dongfeng (23-ўрин, 1,1 фоиз) ҳам муносиб ўринларни банд этди.

Жаҳон автомобил бозоридаги кучли ўнлик

Жаҳон автомобил бозорида ҳозирча Toyota 11 фоизлик улуш билан етакчиликни сақлаб қолмоқда. Кейинги ўринларни Volkswagen (8,1 фоиз) ва Hyundai–Kia алянси (7,6 фоиз) эгаллаган.

Энг йирик автомобил ишлаб чиқарувчилар (топ-10):

1. Toyota — 11 фоиз
2. Volkswagen — 8,1 фоиз
3. Hyundai–Kia — 7,6 фоиз
4. Stellantis — 6 фоиз
5. Renault–Nissan — 5,4 фоиз
6. BYD — 4,8 фоиз
7. Geely Holding Group — 4,6 фоиз
8. General Motors — 4,5 фоиз
9. Chery — 4,1 фоиз
10. Ford — 4,1 фоиз

Умумий рейтинг 

Ўтган ўн йиллик ўрталари билан таққослаганда, хитойлик автомобил ишлаб чиқарувчиларнинг жаҳон бозоридаги мавқеи сезиларли даражада мустаҳкамланган. Илгари Хитойнинг саноқли компаниялари етакчиларга яқинлаша олган бўлса, бугунга келиб бир вақтнинг ўзида учта бренд жаҳон бозоридаги энг йирик ўнталикка кирди.