10 сентябрдан Тошкент – Андижон – Тошкент йўналишида замонавий CRRC-Daliyan электропоезди қатнови йўлга қўйилади. Бу ҳақда «Ўзтемирйўлйўловчи» АЖ хабар берди.

Янги электропоезд 730/729-сонли амалдаги поезд таркиби ўрнида ҳаракатланади.

730-сонли Тошкент – Андижон поезди Тошкентдан соат 09:20 да йўлга чиқиб, Андижонга 13:35 да етиб боради. Қайтиш йўналишида 729-сонли поезд Андижондан 15:38 да чиқиб, Тошкентга 19:53 да етиб келади.

Электропоезд тўртта эконом вагондан иборат бўлиб, жами 357 нафар йўловчи учун мўлжалланган.

Шунингдек, 9–15 сентябрь кунларидан бошлаб Тошкент, Андижон, Қўқон, Наманган, Хива, Урганч, Қўнғирот ва Термиз йўналишларида ҳаракатланувчи қатор поездларнинг жадвали ҳам ўзгартирилади.

Жумладан, 91/92, 93, 95/97, 96, 98/94, 125/126, 127/128, 129/130, 731–734-сонли поездлар ҳамда Қўқон – Андижон ва Қўқон – Наманган йўналишидаги маҳаллий поездлар янги жадвал асосида ҳаракатланади.

Йўловчилардан сафар олдидан янгиланган ҳаракат жадвалига эътибор қаратиш сўралди.