Британиялик қизиқчи саҳнада инсульт ҳақида ҳазил қилиб турган жойида вафот этди
Британиялик қизиқчи Ян Когнито саҳнада инсульт ҳақида ҳазил қилиб турган жойида вафот этди. Касаллик хуруж қилган вақтда томошабинлар буни саҳна кўринишининг бир қисми сифатида қабул қилган ва ёрдамга кеч қолишган.
Бахтсиз ҳодиса 11 апрелда Оксфордширдаги комедия тадбирида рўй берди. Когнито саҳнада бўлган вақтда инсульт касалидан сўнг ўзига келиб, уэльсликлар тилида гапира бошлаганини айтган. Саҳнага чиққач, 10 дақиқа ўтиб ўзини ёмон ҳис қилган қизиқчи стулга ўтириб қолган ва бир неча дақиқа жим қолган.
Томошабинлар буни ҳам ҳазилнинг бир қисми сифатида қабул қилишди ва ҳеч ким ёрдамга ошиқмади. Фақат орадан бир неча дақиқа ўтиб Когнитонинг аҳволи оғирлигини сезиб қолишди ва тез ёрдам чақирилди. Аммо шифокорлар ёрдамга кеч қолганди.
Ян Когнито фаолиятини 1980-йиллар ўртасида бошлаган эди. У 1999 йилда «Time Out Award» совринини олган.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter