Сўнгги вақтларда юртимизда спортчилар иштирокида турли безорилик, қононунбузарлик ҳаттоки ўлим ҳолатларининг кўпайганига гувоҳ бўлмоқдамиз. Ички ишлар вазирлиги Ахборот хизмати томонидан айни шу мавзу «Криминал» кўрсатуви тайёрланди.

Унда спортчилар иштирокидаги бир қатор кўнгилсизликлар, жумладан жорий йилнинг 17 август куни Қарши шаҳри марказида спортчи Элбек Раҳимов бир гуруҳ фуқаролар томонидан калтакланиб, ўлдирилиб кетиши ҳақида сўз боради.

Шунингдек, жорий йилнинг 18 июнь куни Фарғона шаҳрида юз берган катта жанжал ҳақида маълумот берилган.

Қайд этилишича, ЙТҲдан сўнг икки машина эгаларининг тарафдорларидан иборат 20 нафарга яқин ёш йигитлар Фарғона шаҳрида жойлашган «Тараққиёт 2021» корхонаси ҳовлисида тўпланган.

Жанжал бошланган вақтда барча иштирокчилар ИИВ, ДХХ ва Миллий гвардия органларнинг махсус кучлари томонидан қўлга олинади. Воқеа жойидан сову қуроллар, пичоқ ва қиличлар ва гиёҳвандлик воситалари топилган.

Ушбу жанжал иштирокчиларининг асосий қисми ёш ва бақувват спортчи йигитлар бўлган. Уларнинг 8 нафари процессуал тартибда ушланган, 9 нафари 15 суткалик маъмурий қамоққа олинган. Ҳолат юзасидан Жиноят кодексининг 277-моддаси билан жиноят иши қўзғатилган.

Ички ишлар вазирлиги спортчиларни ўз кучларини кўчада кўрсатиш орқали қонунларни бузишдан тийилишга чақирган.