Бугун Ўзбекистон Республикаси Президенти Шавкат Мирзиёев жойларда амалга оширилаётган бунёдкорлик ва ободонлаштириш ишлари, ижтимоий-иқтисодий ислоҳотларнинг бориши билан яқиндан танишиш, халқ билан мулоқот қилиш мақсадида Андижон вилоятига ташриф буюргани ҳақида хабар бергандик.

«Xabar.uz» портали мухбирининг хабар беришича, айни пайтда Улуғнор туманида вилоят фаоллари ва мутасаддилар иштирокида йиғилиш ўтказилмоқда.

Шавкат Мирзиёев йиғилиш аввалида йиғилганларни ва Ўзбекистон халқини Рамазон билан табриклади.

«Ушбу қутлуғ ва барокатли кунларда яратгандан ҳар бир кунимиз тинч ва осойишта бўлишини, сизга ва оила аъзоларингизга, бутун халқимизга мустаҳкам соғлиқ саломатлик ва қут барака ва бахт саодат ёр бўлишини тилайман.

Ватанимиз тараққиёти, юртимизнинг ободлиги ва халқимиз фаровонлиги учун олиб бораётган барча ишларимизга қодир Аллоҳ ўзи мададкор бўлсин, деб ҳар биримиз шундай ниятлар билан яшасак, қутлуғ Рамазон ойида масжидларда, файзли хонадонларда ўқилаётган дуолар ижобат бўлади. Нега деганда, мана шу улуғ Рамазон ойида рўза тутган мўмин мусулмонларимиз, халқимиз дуо қилганда юртимизнинг тинчлик осойишталигини сўраб дуо қилади. Қутлуғ Рамазон кунлари бутун халқимизни чин дилдан муборакбод этаман.

Мана шу айтилган ҳамма гап чин юракдан. Бизнинг ҳамма қилаётган ишларимиз мана шу ҳалқимиз, одамларимиз шукроналик билан яшаши учун. Мана Ўзбекистон шароитида ўтказган қуръон ўқиш мусобақасини қилганимиз, бу ўқилган дуолар, қуръон сураларида янграган, юрагидан айтилган сатрлар, мен ўйлайманки, халқимизни тинчликка, осойишталикка садоқат билан, шукроналик билан яшашга даъват этади. Ва бу дуоларнинг тагига жуда катта маъно, мазмун бор. Бирорта бой, қудратли давлатда бундай буюк аждодлари бор миллат дунёда йўқ, десам ишонинглар. Шунинг учун, биз мана шундай аждодларимизга муносиб бўлиб, мана шундай улуғ кунлар бизга ярашиб, шу улуғ кунларда яратганимиздан халқимизга тинчлик хотиржамлик сўраймиз.

Шу фурсатдан фойдаланиб, бутун халқимиз, шу жумладан, Андижон аҳлини чин дилдан табриклайман».