O‘zbekiston Respublikasi Prezidenti Shavkat Mirziyoyev joylarda amalga oshirilayotgan bunyodkorlik ishlari bilan yaqindan tanishish maqsadida Surxondaryo viloyatiga tashrif buyurishi haqida xabar bergan edik.

Davlat rahbari joylarda ijtimoiy-iqtisodiy islohotlarning borishi, amalga oshirilayotgan bunyodkorlik va obodonlashtirish ishlari bilan yaqindan tanishish, xalq bilan muloqot qilish maqsadida bugun, 19-yanvar kuni Surxondaryo viloyatiga jo‘nab ketdi. Bu haqda O‘zA xabar berdi.

Eslatib o‘tish kerak, Prezident 2017-yil 10-11-fevral kunlari Surxondaryo viloyatiga tashrifi chog‘ida ko‘plab istiqbolli loyihalar bilan tanishgan va hududni ijtimoiy-iqtisodiy rivojlantirish yuzasidan zarur topshiriqlar bergan edi.

Ma’lumot uchun: Surxondaryo viloyati 1941-yil 6-martda tashkil topgan. Aholisi soni 2 million 500 ming. Umumiy yer maydoni 20,1 ming kvadrat kilometr. Viloyatda 280,8 ming gektar ekin maydoni mavjud. Shundan sug‘oriladigan yerlar – 240,9 ming gektar. Viloyat markazi – Termiz shahri. Viloyatdagi 13 ta tumanning har biri o‘ziga xos salohiyatga ega. 24 yirik sanoat korxonasi, 60 qo‘shma korxona, 11 mingdan ziyod kichik biznes va xususiy tadbirkorlik sub’yekti faoliyat yuritmoqda.