Shu yilning 19-23-iyun kunlari Samarqandda umumiy o‘rta ta’lim maktablarining 10-11-sinf o‘quvchilari o‘rtasida fizika va astronomiya fanlari bo‘yicha Mirzo Ulug‘bek nomidagi xalqaro olimpiada o‘tkazilishi haqida xabar bergan edik.

Prezident Shavkat Mirziyoyev tashabbusi bilan tashkil etilgan mazkur nufuzli xalqaro tanlovda O‘zbekiston, Rossiya, Belarus, Yaponiya, Qozog‘iston, Qirg‘iziston va Turkmanistondan vakillar ishtirok etdi. Ilk bor tashkil etilgan xalqaro olimpiadada ushbu mamlakatlardan 45 nafar iste’dodli o‘quvchi fizika va astronomiya fanlari bo‘yicha bilimini sinovdan o‘tkazdi.

Bugun, 24-iyun kuni xalqaro olimpiada g‘olib va sovrindorlari aniqlandi. Bu haqda Xalq ta’limi vazirligi axborot xizmati xabar berdi.

Astronomiya fanidan qirg‘izistonlik Anarbekov Iriskeldi oltin medalni qo‘lga kiritdi. Qozog‘iston vakili Amankul Janibek kumush medalga, hamyurtimiz Bozorqulov Do‘stmamat va yana bir qozog‘istonlik o‘quvchi Kenes Yerjan bronza medalga sazovor bo‘lishdi.

Fizika fanidan O‘zbekiston jamoasi a’zosi Umidjon Hafizov g‘oliblikni qo‘lga kiritdi. Tinichbekov Temur (Qirg‘iziston), Amangeldi Islam (Qozog‘iston) va o‘zbekistonlik Hasanov Otabek va Nosirov Abdurahmonlar kumush medalga sazovor bo‘lishdi. Turkmanistonlik Xodjamurodov Meylis, qozog‘istonlik Telman Yerasil, Namugambetova Madina, qirg‘izistonlik Sidiqov Ernazar hamda hamyurtlarimiz Roziqov Soliboy, Halimov Bobur bronza medaliga munosib deb topildi. G‘oliblar tashkiliy qo‘mita tomonidan tantanali ravishda taqdirlandi.

Mirzo Ulug‘bek nomidagi xalqaro olimpiada har ikki yilda an’anaviy tarzda Samarqandda o‘tkazilishi ko‘zda tutilgan.

Mirzo Ulug‘bek nomidagi xalqaro olipiadaning fizika fani bo‘yicha yakuniy natijalari

Mirzo Ulug‘bek nomidagi xalqaro olipiadaning astronomiya fani bo‘yicha yakuniy natijalari