Венесуэла парламенти мамлакат нефть захираларининг қарийб бешдан бир қисми назорати АҚШга топширилишига доир ҳужжатни маъқуллади. Николас Мадуродан кейин давлат тепасига келган янги маъмурият Вашингтоннинг қатъий талабларига кўнишга мажбур бўлган.  

Венесуэла Миллий ассамблеяси «мисли кўрилмаган» дея аталаётган нефть битимини қўллаб-қувватлаган. Аммо Каракасдаги айрим мухолиф депутатлар овоз беришдан тийилган. 

«Биз битимда митти ҳарфлар билан нимлар ёзилганини билишимиз шарт», – деган депутат Луис Эмилио Рондон.

Миллий ассамблея раиси Хорхе Родригес эса Қўшма Штатлар билан тузилган битим Венесуэла халқи манфаатларига хизмат қилишини таъкидлаган. 

АҚШ Эрон билан уруш фонида энергетика ресурслари нархини туширишга зўр бериб уринмоқда. Шунга кўра президент Дональд Трамп маъмурияти Венесуэла билан тузилган битим америкаликлар учун бензин нархини туширишга хизмат қилишини урғуламоқда.   

Кузатувчилар ушбу битим Вашингтон учун Каракас ҳукуматига нисбатан кучли таъсир қуролига айланишини айтмоқда. 

Туркия матбуоти хабар беришича, янги битим ортидан АҚШ ширкати (North American Blue Energy Partners) Венесуэладаги 17 та нефть конида 100 йил муддатда фаолият ҳуқуқига эга бўлади. Мазкур конларнинг захираси 65 миллиард баррель деб баҳоланмоқда. 

АҚШ Венесуэланинг янги ҳукумати билан тузилган битим орқали Хитой ва Россия таъсирини ҳам пасайтиришни кўзламоқда. АҚШ назоратига ўтаётган конларда ҳам бунга қадар Москва ва Пекин ширкатлари фаолият юритиб келган. 

АҚШда жорий йил ноябрь ойида оралиқ сайлов бўлиб ўтади. Сайлов арафасида Трамп маъмурияти учун нефть нархи ҳаёт-мамот аҳамиятига молик масала бўлиб қолмоқда.

Аввал хабар берганимиздек, Вашингтон эндиликда Венесуэлада қазиб олинадиган нефтнинг 20 фоизини таннарх бўйича устувор тарзда сотиб олиш ҳуқуқини ҳам қўлга киритади.

Президент Трамп ҳам Венесуэла билан тузилган битимни «жаҳон тарихидаги энг йирик нефт келишуви» дея мақтанмоқда. 

Маълумот ўрнида: жорий йил 3 январга ўтар кечаси АҚШ Венесуэла пойтахти Каракас ҳамда мамлакатнинг бошқа ҳудудларига ҳарбий ҳужум уюштирди.

Ҳарбий амалиёт давомида Венесуэла президенти Николас Мадуро ва унинг рафиқаси Силия Флорес Каракасдаги саройидан ўғирлаб АҚШга келтирилди. Қўшма Штатлар расмий идоралари Мадурога нисбатан наркотерроризм, гиёҳвандлик моддалари контрабандаси, ноқонуний қурол-яроғ савдоси каби моддалар бўйича айблов эълон қилган.

Мадуронинг ҳибсга олиниши ортидан Трамп Венесуэланинг вақтинчалик президенти Делси Родригесга нисбатан таҳдидли баёнотлар берган эди. Жумладан, у Родригес ҳатто Мадуродан ҳам «юқорироқ нарх тўлаши» эҳтимоли борлигини айтган. 

Таҳлилчиларга кўра, ушбу босимлар ортидан Родригес Трампнинг йўриғига юришга мажбур бўлган. 

Мадурони ўғирлаш амалиётини Қўшма Штатларнинг ютуғи сифатида кўрсатиб келаётган Трамп Венесуэлани АҚШнинг 51-штати дея иддао қилгани ҳам маълум.