Владимир Путин 5 сентябр соат тунги ўн иккидан бошлаб уч сутка давомида Киевга зарба бермасликни буюрди. Кремль матбуот котиби Дмитрий Песков ТАСС учун берган баёнотида бу қарор Украина пойтахтида Америка музокарачиларининг учрашувларини тайёрлаш ва ўтказиш билан боғлиқлигини айтди.

Кеча Axios портали ўз манбаларига асосланиб, Уиткофф ва Кушнернинг шу дам олиш кунлари Украинадаги можарони ҳал қилиш йўлларини муҳокама қилиш мақсадида Москва ва Киевга сафарлари режалаштирилгани ҳақида ёзган эди.

АҚШ президенти Доналд Трамп Украинадаги вазиятни тартибга солиш бўйича музокаралар учун махсус элчиларини юборганини маълум қилди. Унинг сўзларига кўра, Вашингтонда эҳтимолий тинчлик шартномаси бўйича янги ғоя пайдо бўлган.

Уиткофф ва Кушнер Москвага охирги марта шу йилнинг январ ойида келишган ва ўшанда Россия президенти билан музокаралар ўтказишган эди.

Путиннинг буйруғи фақат Киев шаҳрига бериладиган зарбаларга тегишли. Бу бутун Украина бўйлаб умумий ўт очишни тўхтатиш ёки фронт чизиғидаги ҳарбий ҳаракатларни тугатиш англатмайди, бошқа ҳудудларда жанглар давом этмоқда.