Озарбайжонда давлат мактабларида кийиниш қоидаларининг жорий этилиши ортидан норозиликлар юзага келди. Ҳижоб ўраган қизларнинг дарсларга киритилиши масаласи бўйича ўқувчилар ва ота-оналар бир нечта мактаб олдида намойиш ўтказди. Ҳодисалар билан боғлиқ равишда 37 киши ҳибсга олинган.

Норозиликларга нима сабаб бўлди?

Маълумотларга кўра, Озарбайжон ҳукумати 21 сентябрь куни давлат умумтаълим мактабларида ўқувчиларнинг ташқи кўриниши ва кийинишига оид янги талабларни қабул қилган. Ҳужжатда ҳижобни тақиқлаш ҳақида бевосита қоида келтирилмаган бўлса-да, мактаб формасининг ягона стандартига зид ёки дунёвий таълим тамойилларига мос келмайдиган кийим элементлари тақиқланган.

Шунга қарамай, маҳаллий оммавий ахборот воситалари хабарларида айрим мактаб маъмуриятлари ҳижоб ўраган қизлардан уни ечишни талаб қилгани айтилган. Бунга жавобан Боку ва мамлакатнинг Масалли туманида айрим ўқувчилар ҳижоб ўраган синфдошларини қўллаб-қувватлаб, дарсларга қатнашмаган.

Бокуда намойишчилар «Ҳижоб таълим олишга тўсиқ эмас» деган ёзувли баннерларни кўтариб чиқишган.

37 киши нима учун ҳибсга олинди?

Озарбайжон Ички ишлар вазирлиги маълумотига кўра, айрим шахслар мактаб ходимлари билан низолар келтириб чиқарган, давлат таълим муассасаларига зарар етказган, жамоат тартибини бузган, транспорт ҳаракатига ва мактабларнинг нормал фаолиятига тўсқинлик қилган.

Ушбу ҳолатлар юзасидан Жиноят кодексининг 233-моддаси — жамоат тартибини бузишга олиб келадиган ҳаракатларни ташкил этиш ёки уларда фаол иштирок этиш бўйича жиноят иши қўзғатилган. Вазирликка таяниб хабар берган «Интерфакс» агентлиги 37 киши ҳибсга олинганини маълум қилди.

Ўқитувчиларга ҳам янги талаблар жорий этилган

6 октябрь куни ўқитувчиларнинг ташқи кўринишига оид алоҳида талаблар ҳам тасдиқлангани хабар қилинди. Унда ишбилармонлик услубида кийиниш ва дунёвий таълим тамойилларига риоя қилиш масалалари кўтарилган.

Шу тариқа, мактаб формасига оид янги талабларнинг амалда қўлланилиши Озарбайжонда ҳижоб ва таълим муассасаларидаги кийиниш қоидалари бўйича баҳсларни кучайтирди. Ҳукумат қабул қилган ҳужжат ҳижобни бевосита тилга олмаган бўлса-да, айрим мактабларда уни ечиш талаби қўйилгани ҳақида хабарлар тарқалган.