АҚШ президенти Дональд Трамп Атлантика ёки Тинч океанининг номини ўзгартириб, улардан бирини «Трамп океани» ёхуд «Америка қитъалари океани» деб аташ мумкинлигини айтди. Бу ҳақда Fox News ва The Washington Post нашрлари хабар берди.

Мазкур таклиф 10 октябрь куни Теннесси штатидаги Кларксвилл шаҳрида бўлиб ўтган сайловолди митингида билдирилган. Трамп нутқи давомида аввал Мексика қўлтиғининг «Америка қўлтиғи» деб қайта номлангани ва Онтарио кўлига янги ном берилганини тилга олган.

«Бизда қўлтиқ бор, чиройли кўлимиз ҳам бор. Энди кимдир дарё ҳам кераклигини айтди. Бизга дарё ва океан керак», – деган Трамп.

У Атлантика ёки Тинч океанини танлаш мумкинлигини айтиб, уларни «Трамп океани» ёки «Америка қитъалари океани» деб аташ ғоясини илгари сурган. Унинг бу гаплари тадбир иштирокчиларининг кулгиси ва қарсаклари билан кутиб олинган.

Трампнинг бу баёноти унинг географик номларни ўзгартиришга доир аввалги ташаббусларини эслатади. 2025 йил январь ойида у Мексика қўлтиғини «Америка қўлтиғи» деб аташ тўғрисида фармон имзолаган эди. Бу қарор халқаро миқёсда баҳсларга сабаб бўлган, айрим оммавий ахборот воситалари эса янги номни қўллаш масаласида АҚШ маъмурияти билан келишмовчиликка борган.

The Washington Post нашрининг таъкидлашича, АҚШ ҳукумати мамлакат ичида географик объектлар номини ўзгартириш ваколатларига эга. Бироқ бундай номларнинг халқаро миқёсда қабул қилиниши алоҳида масала ҳисобланади.

Ҳозирча эса Атлантика ёки Тинч океанини «Трамп океани» деб қайта номлаш бўйича расмий қарор эълон қилингани ҳақида маълумот йўқ.