Жиноят ишлари бўйича Марғилон шаҳар судининг 2026 йил 20 январдаги ҳукми билан 1990 йилда туғилган Э.Т. айбли деб топилди.

Суд материалларига кўра, Э.Т. муқаддам судланган бўлиб, у “АК ХАЛҚПАРВАР ГУРУҲИ” МЧЖга қарашли “Антикоррупция” ОАВда мухбир сифатида ишлаб келган. У Жиноят кодексининг бир қатор моддалари, жумладан, 139-модда 3-қисми “г” банди (туҳмат), 140-модда 3-қисми “а” банди (ҳақорат қилиш), 165-модда 1-қисми (товламачилик), 219-модда 1-қисми (ҳокимият вакилига ёки фуқаровий бурчини бажараётган шахсга қаршилик кўрсатиш), 227-модда 2-қисми “а” банди (ҳужжатлар ва давлат рақам белгиларини ноқонуний эгаллаш ёки яшириш) ҳамда 244-6-модда 1-қисми (ёлғон ахборот тарқатиш) билан назарда тутилган жиноятларни содир этганликда айбланган.

Суд ҳукмига асосан, Э.Т.га Жиноят кодексининг 59 ва 61-моддалари тартибида 3 йил 10 ой озодликдан маҳрум қилиш жазоси тайинланган. Шунингдек, Жиноят кодексининг 60 ва 61-моддаларига асосан унга илгари берилган шартли равишда муддатидан олдин озод қилиш қарори бекор қилиниб, якуний ҳисобда 4 йил муддатга озодликдан маҳрум қилиш жазоси белгиланди.

Тайинланган жазо қаттиқ тартибли колонияда ўталиши белгиланган.